Ministria e Financave në Kosovë ka marrë vendimin të subvencionojë 50% të pagës së punëtorëve dhe 50% të shpenzimeve të qirasë për sektorët më të prekur nga pandemia. Mjetet do të ndahen në fund të muajit prill ose në fillim të muajit maj.
Kryetari i Odës Ekonomike të Kosovës Berat Rukiqi ka treguar se pas takimit me ministrin e Financave, Punës dhe Trasfereve, Hekuran Muratin dhe kryetarin e Shoqatës së Gastronomëve të Kosovës, Petrit Kllokoqin, kanë rënë dakord që sektorëve direkt, të ndikuar nga masat e reja për luftën kundër pandemisë, të subvencionohen pagat e punëtorëve dhe shpenzimet e qirasë për 50%.
“Gjithashtu do të ndërmerren veprime shtesë për përkrahje të sektorëve me specifika të veçanta, përfshirë sektorin e transportit, pas diskutimeve që do të zhvillohen me këta sektorë. Falënderojmë ministrin Murati për veprimin e shpejtë, në lehtësimin e gjendjes jo të lehtë të sektorëve të ndikuar nga masat e fundit kufizuese.”- ka treguar ai.
Ndërkohë që ‘duartrokasim’ këtë vendim të qeverisë së Kosovës, ngremë shqetësimin për situatën aktuale të vendit tonë.
Deri tani, qeveria nuk ka përgatitur asnjë paketë ndihme për t’ia lehtësuar sado pak barrën bizneseve në Shqipëri, një pjesë e madhe e të cilëve janë detyruar të mbyllin dyert e tyre.
Rikujtojmë se baret dhe restorantet janë sektori më i goditur nga pandemia. Shqipëria ka rreth 18 mijë bare e restorante (82% e të cilave janë bar-kafe), sipas INSTAT, me mbi 50 mijë të punësuar, ose rreth 10% të të punësuarve në sektorin privat në total.
Por vetëm në tremujorin e parë të vitit 2020, numri i të punësuarve në këtë aktivitet ra me 21.7% dhe fondi i pagave u tkurr me rreth 20.6%, duke shënuar performancën më të keqe nga të gjithë sektorët e shërbimeve sa i takon punësimit.
A do të ketë një dorë ndihme edhe për bizneset në vendin tonë, ndërkohë që situata vazhdon të përkeqësohet? Kjo mbetet në dorë të qeverisë, e cila s’po lëviz asnjë gur për të nxjerrë bizneset nga ‘humnera’.
/Iconstyle.al
