Pas fitores në ndeshjen finale në xhudo, të gjithë e panë Majlinda Kelmendin të qante në krahët e trajnerit Driton Kuka. Ai mundohej ta qetësonte edhe pse dukej qartë që ishte edhe vetë i emocionuar.
Por pak e dinë, që veç një marrëdhëie porfesionale shumë të ngushtë, ata kanë edhe një afërsi familjare. Trajneri më i mirë kosovar paslufte, Driton Kuka, është i lidhur mjaft ngushtë me xhudisten më të mirë në botë, Majlinda Kelmendi, shkruan Zëri.
Kuka është i martuar me Kaltrina Kelmendin, motrën e madhe të kampiones botërore, evropiane dhe medalisten e artë olimpike, në kategorinë 52 kg.
Pikërisht falë Kaltrinës, Kosova sot krenohet me faktin se xhudistja numër 1 në botë është shtetase e saj. Në fakt, Kaltrina Kelmendi-Kuka, në moshë të re kishte filluar të merrej me xhudo. Teksa ushtronte me qejf e intensitet, Kaltrina kishte vendosur ta afrojë në këtë sport edhe motrën e saj, Majlindën.
