“Nëse po kërkoni për diçka paksa ndryshe për pushime, atëherë merrni në konsideratë Shqipërinë, një perlë në kurorën e Detit Adriatik”. Kështu nis shkrimi i gazetës britanike “Sunday Express”, kushtuar turizmit shqiptar me titull “Shqipëria: Plazhet e virgjëra të Mesdheut ku një birrë kushton më pak se 1 paund”.
Artikulli shkruan për plazhet e bukura të Shqipërisë, të cilën e konsideron si perlën e panjohur të Europës me plazhe jo të mbipopulluara, ujëra të kaltër dhe birrë të lirë në çmim.
Për gazetën britanike, Shqipëria është në mënyrë të pabesueshme e sigurt dhe e paqtë për ta vizituar. Në kushtet kur pritet të rriten çmimet e pushimeve europiane pas daljes së Britanisë nga BE-ja, “Sunday Express” sugjeron se Shqipëria mund të jetë një nga vendet e fundit ku mund të shijosh pushime të lira për xhepat e pushuesve britanikë, kaq afër gjeografikisht me ishullin.
“Pushuesit britanikë mund të shijojnë vendet e trashëgimisë botërore të mbrojtura nga UNESCO në Shqipëri, por edhe Tiranën, një metropol që është një qytet i këndshëm dhe tërë gjallëri, me kafene mjaft të bukura, bare tërë stil dhe arkitekturë komuniste me plot ngjyra që ju lë pa mend”, shkruan gazeta.
Shkrimi, i cili lë pa përmendur mungesën e infrastrukturës apo mungesën e pastërtisë së plazheve, duket se është fokusuar vetëm te bukuria natyrore dhe çmimet e lira për nivelin e jetesës britanike.
Gazeta nuk përmend as çmimet e kripura të udhëtimit për në Shqipëri, e as mungesën e paketave turistike siç ndodh me destinacione të tjera tradicionale, ku shkojnë pushuesit britanikë.
“Por për pjesën më të madhe, qëllimi i fundit është të shijoni plazhet e mrekullueshme të “Rivierës”, shkruan “Sunday Express”.
Ndërsa shkrimin e mbyll me fjalinë: “Shqipëria është vendi ku duhet të shkoni para se të zbulohet sekreti”.
Burimi: Sunday Express
