Rasti i konsideruar i paprecedentë i abuzimit seksual i një vajze nga babai për 3 vite resht që u denoncua nga emisioni “Fiks Fare”, në fakt nuk është aspak i paprecedentë.
Psikologia e Policisë së Tiranës, Besmira Muça, tregoi se këtë vit, ka patur më tepër denoncime sesa vitet e fundit, kryesisht nga vajza minorene dhe ndër abuzuesit janë gjyshër, baballarë si edhe të tjerë pjestarë ose të afërm të familjes.
“Gjatë periudhës 6 mujore të vitit 2019, Drejtoria Vendore e Policisë Tiranë ka evidentuar 29 raste të abuzimeve seksuale, 26 prej të cilave janë zbuluar dhe janë arrestuar 17 autorë të këtyre veprave penale.”, u shpreh Muça për “Report Tv”. “Abuzues të këtyre krimeve seksuale kanë ndodhur si brenda familjes dhe jashtë saj, duke përmendur këtu babain, gjyshin, dajën apo edhe pjesëtarë të tjerë të familjes të cilët kanë pasur rrethana lehtësuese lidhur me një të mitur, i cili është në kushtet e viktimës.”
Sipas saj, rastet e denoncuara kanë ndodhur kryesisht në zona rurale, ndonëse nuk e përjashton kryeqytetin. Besmira Muça theksoi se janë caktuar dy dhoma të veçanta vetëm për të realizuar takimet e viktimave të abuzimit me psikologun dhe u shpreh se historitë dhe identiteti i tyre janë plotësisht të mbrojtur.
“Ajo që unë bëj thirrje për të gjitha vajzat e gratë, apo edhe djemtë që ndjejnë se abuzohen nga persona të afërt ose jo, mund t’i drejtohen policisë duke u premtuar besueshmëri dhe rritje të kofidencialitetit lidhur me mënyrat se si do intervistohen dhe se si do të trajtohen më tej, si dhe ndihma që u jepet me organizata qeveritare ose jo qeveritare për kujdesin që i jepet viktimës.”
Vetëdija në lidhje me këtë fenomen u shtua ndjeshëm muajin e fundit, pas publikimit të një rasti abuzimi seksual nga babai që në moshën 15-vjeçare, i cili u publikua nga “Fiks Fare” para pak ditësh.
Akoma më tronditës e bëri publikimi i një inçizimi të cilin vajza e bëri fshehurazi në momentet kur babai i saj tentonte të kryente marrëdhënie seksuale me të me dhunë. Më tej, ajo tentoi të gjente mbështetjen e mamasë, por ajo e refuzoi.
