Së fundmi në emisionin “Opinion” që transmetohet në “Tv Klan” janë nxehur gjakrat mes të ftuarve në panel dhe biseda ka degraduar në ofendime të rënda.
Gazetari Baton Haxhiu po diskutonte së bashku me ish-deputeten Mesila Doda për çështjen e korrigjimit të kufijve të Kosovës dhe përplasjen në distancë mes Ramës dhe Haradinajt, ndërkohë ka mjaftuar një fjali e Batonit që biseda të merrte një rrjedhë aspak normale.
Fillimisht Baton Haxhiu, u shpreh: “Zoti Rama ka refuzuar kategorikisht të flasë për këtë temë dhe Zoti Vuçiç nuk e ka hapur fare temën e ndryshimit të kufijve.”
“Është e njëjta pasaktësi që zotëria para disa ditësh tha që gjermanët kanë qenë kundër bombardimeve të NATO-s. Është e njëjta narrativë”, tha Doda duke iu kundërpërgjigjur Haxhiut në vijim me fjalët: “Ti po gënjen!”
Baton Haxhiu: “Ti mund t’i thuash vetëm bashkëshortit tënd që gënjen.”
Mesila Doda: “Bashkëshorti im nuk gënjen. Ti gënjen. Edhe herë tjetër mos guxo të më flasësh mua… Ti je i paedukatë, je rrugaç. Me mua flit mirë kur je në një sallë. E di çfarë të bëj apo jo? Guxon edhe një herë të flasësh për mua me këtë gjuhë dhe kjo shishe të përfundon në kokë ty. Rrugaç dhe gënjeshtar, ordiner!”
Mesila tentoi që të hidhte shishen në drejtim të Batonit, mirëpo moderatori i emisionit Blendi Fevziu ka ndërhyrë duke i thënë që ta lërë shishen në vend.
Për më shumë shikoni videon e mëposhtme…
