Hap Instagramin dhe kontrollon të gjithë ata që të kanë parë postimin në Insta Story, shikon kush ta ka pëlqyer apo ka komentuar në foton e fundit, që postove me shoqen. Dhe në atë moment shikon se ke miqësi të reja, që kërkojnë të dinë më shumë kush je ti apo thjesht sepse duan të shtojnë numrin e ndjekësve.
Mes atyre që kishin shtypur butonin “follow” në profilin e saj, Loredana vendosi që të pranonte kërkesën e Arditit dhe ta lejonte që të hynte në “jetën” e saj virtuale.
Pjesa tjetër mbetet vetëm histori, deri në momentin kur një ditë “të bukur” i vjen një ftesë nga emisioni “Dua të të bëj të lumtur”, pasi dikush dëshironte t’i bënte një surprizë.
Ajo do të mendonte se në anën tjetër të ekranit mund të ishte kushdo nga të njohurit e saj, veç atij djalit me të cilin shkëmbeu disa mesazhe për disa kohë, refuzoi dëshirën e tij për t’u njohur më shumë dhe ia bëri të qartë që nuk donte ta bezdiste më.
Shumë qeshën me situatën e krijuar në studio dhe me arsyen e surprizës, të tjerë madje vijojnë që të cenojnë jetën e Loredanës, duke e bërë imazhin e saj “meme” në rrjetet sociale dhe të tjerë, si puna ime, janë ende të shokuar nga ajo që ndodhi mbrëmjen e 26 dhjetorit.
Ndërsa komentet dhe reagimet pushtojnë rrjetet sociale prej tre ditë, ne vendosëm të merrnim një gjykim profesionist, për dëmin psikologjik që iu shkaktua brenda pak minutave dy personazheve.
“Do të doja të mos e kisha parë, madje do të doja që ai emision të mos ishte bërë fare. Kjo për arsye të dëmit psikologjik që dy të rinjtë mundet të kenë pësuar në atë emision. Nuk mundem të flas me siguri pa folur më parë me ta, por sjellja e tyre gjatë emisionit ndryshoi. Për shembull, djali u përball me një refuzim nga ana e vajzës, pra, ai u zhgënjye. Kjo, natyrisht që mund të ndodhë në jetën reale, por kur ndodh përballë një publiku të madh, atëherë mendoni sesa i madh është dëmi që i shkaktohet atij. Nga ana tjetër, vajza (dhe mendoj se ajo është dëmtuar më shumë), u përball me një “surprizë” të papritur dhe të pakëndshme për të (mjafton të shohësh shtangien e saj kur sheh djalin në ekran, duke i propozuar, si dhe më pas që mezi arrin të shqiptojë fjalët). Natyrisht, ajo e kishte të drejtën për të thënë jo dhe emisioni është kujdesur për ta mbrojtur (më e pakta), por sa vlen kur ekspozimi i kësaj vajze përballë njerëzve të tjerë mundet ta ketë bërë objekt talljeje dhe ngacmimesh të mëtejshme?”, shprehet psikologia Lediona Braho për “iconstyle.al”.
Pavarësisht sjelljes së dy të ftuarve të panjohur, ajo që goditi më shumë opinionin publik ishte fakti që televizioni shfrytëzoi imazhin e tyre në përfitim të audiencës.
“Mendoj se emisioni duhej ta kishte informuar vajzën dhe të mos e përdorte emrin dhe imazhin e saj për qëllimet e veta dhe të djalit. Sot, ka shumë të rinj që njihen në hapësirat virtuale dhe që mund të krijojnë marrëdhënie reale, por zgjedhja për të bërë një emision pa u siguruar më parë se të dyja palët e donin këtë gjë, mua më duket jo e drejtë”, thotë psikologia Braho.
Me zhvillimin e teknologjisë, të gjithë jemi në vorbullën e rrezikut të rrjeteve sociale, por është zgjedhja personale sesi e përballojmë. Loredana mund të ishte kushdo prej nesh, pasi të kishim pranuar një të panjohur në Instagram. Ndërsa Arditi, një djalë që ngatërron botën virtuale me atë reale. Dashuria në botën virtuale është diçka e zakonshme në ditët e sotme, por duhet të keni kujdes që të mos kaloni kufijtë.
Sipas psikologes, rrjetet sociale mund të jenë shpesh më shumë të dëmshme sesa të dobishme:
“Problemi lind kur rrjetet sociale kthehen në të vetmin vend ku të rinjtë ‘takohen’ me njëri-tjetrin, shkëmbejnë foto, mesazhe dhe video me njëri-tjetrin (të cilat, mund të bëhen edhe intime dhe seksuale) dhe nuk takohen asnjëherë. Një i ri ose e re, në përpjekje për të fituar pëlqimin dhe aprovimin e personit tjetër, detyrohet shpesh të dërgojë foto intime, të cilat edhe mund të keqpërdoren. Ekspozimi në rrjet dhe përballë një publiku të gjerë i detajeve intime është gjithmonë i dëmshëm, ndaj mund të shoqërohet me pasoja të rënda, shpesh fatale. Detyra jonë është të parandalojmë që kjo të ndodhë”.
Ndërsa e vetmja gjë që mund të bëjmë është që të mendohemi mirë kur pranojmë “mikun virtual” të radhës, përgjegjësia bie mbi ata që shfrytëzojnë privatësinë tonë për audiencën e tyre.
Po sot, kush e mban peshën e rëndë të thashethemeve?
Burimi: Iconstyle.al
