Aktorja e njohur Ana Lika di të jetë gjithmonë në qendër të vëmendjes me fotot e saj provokuese, me batuat plot humor, por edhe me risitë nga jeta e saj private. Me tipin e saj të çiltër Ana i ka bërë të gjithë për vete dhe është një ndër aktoret shqiptare më të ndjekura në rrjetet sociale.
Së fundmi aktorja simpatike ka qenë e ftuar në “Top Albania Radio” ku ka folur jo vetëm për anën profesionale, por edhe për jetën personale. Ndër të tjera Ana rrëfeu edhe një ndër çmenduritë që ajo ka bërë kur ka qenë vetëm 18 vjeç.
Në atë kohë Ana kishte një dëshirë të madhe që të blinte një makinë dhe i lutej vazhdimisht prindërve, mirëpo ata nuk dëshironin. Pas lutjeve të shumta nga ana e saj më në fund ishte gjyshja ajo që ia plotësoi dëshirën duke i blerë makinën e parë, megjithëse ajo ende nuk kishte patentë.
Gjatë emisionit Ana rrëfeu se me të marrë makinën ajo vendosi të bënte një xhiro nga Liqeni Artificial. Ndërkohë që ishte e lumtur pasi i ishte plotësuar dëshira e saj më e madhe, Ana u ndalua nga 2 policë të cilët e arrestuan pasi aktorja nuk kishte patentë. Prindërit u alarmuan kur morën vesh arrestimin e së bijës, por më pas e kaluan me humor këtë situatë dhe u shndërrua në një batutë që kujtohej vazhdimisht.
