Ndonëse divorci i çiftit u bë publik në 2016-n, në fakt ai nisi një vit përpara se të dilnin lajmet që shokuan të gjithë fansat e çiftit. Tashmë një vit pas ndarjes, Angelina Jolie ka treguar në një intervistë se në fakt divorci i tyre duket sikur u hap kur ata të dy xhiruan filmin “By the sea”.
Në këtë film, flitet për një çift të cilët janë dashur marrëzisht, por monotonia ka vrarë jetën e tyre. Gruaja është gjithë kohës larg vëmendjes së burrit të saj, gati në depresion, pi vazhdimisht ilaçe, ndërkohë që burri merret vetëm me pasionet e tij dhe konsumon alkool. Çifti në film përpiqet të rregullojë jetën sentimentale, por shumë ngatërresa e fjalë të pathëna e bëjnë të pamundur rindezjen e dashurisë.
Në role kryesore, luajnë Jolie dhe Pitt dhe për ironi duket sikur kjo ka qenë historia e tyre dhe jo thjesht histori filmi. Angelina ka treguar se ajo e ka shkruar vetë skenarin e filmit dhe gjatë kohës që xhironin “By the sea” ka pasur shumë zënka me Brad.
“Mendova se ziheshim, sepse ishim përfshirë në ato role, ndërsa sot mendoj se ai film ishim ne. Jo rastësisht kishim aq nervozizëm, e ndjenim se filmi fliste historinë tonë dhe jo më kot u frymëzova pikërisht për atë skenar. Unë dhe Pitt, ishim duke përjetuar dilemat e marrëdhënies sonë reale, të veshur në aktorët e “By the sea”, rrëfeu Jolie, e cila u shpreh se nuk është penduar për realizimin e atij filmi.
