Ndërsa e shohim sot Getoarin, atë mashkullin e dashuruar, shumë modern në veshje dhe në paraqitje, me siguri nuk do ta lidhni me atë të viteve 2000. Kur u shfaq për herë të parë me grupin “Tingulli Trent” bëri shumë bujë dhe rrugëtimi i tij në karrierën e muzikës ishte gjithmonë në rritje. Por pati shumë ndryshime.
Dy nga hitet e tij të para që na vijnë ndërmend janë “Ai është i trent” dhe “Kishe unë bukuroshe” rreth viteve 2001. Ndërsa në këngën e parë iu përshtat tematikës së një “të çmenduri”, me veshjen e një pacienti, te hiti i dytë tashmë na duket shumë komik.
Me kostumin metalizato, bluzën e kuqe, shaminë të lidhur në kokë dhe syzet me xham të kuq (që kanë dalë sërish në trend), Geti duket se është më i lirshëm në kërcim se sa ditën e dasmës me Marina Vjollcën.
Le të shkojmë një vit më pas në 2002-shin, te kënga “Llokum me arra”, te flokët “ikonë” të reperit kaçurrela. Ishte viti kur bëri një revolucion në muzikën shqipe, për të thyer më pas shumë rekorde në Shqipëri dhe Kosovë.
Më pas 35-vjeçari nis me bashkëpunimet me këngëtaret më të pëlqyera të muzikës shqiptare.
Fillimisht e nisi me Çiljetën me këngën “Dridhe” në vitin 2003. Reperi dhe këngëtarja duken shumë ndryshe imazhit të tyre të ditëve të sotme. Ndërsa Çiljeta ka pranuar se ka zvogëluar hundën, nga Getoari nuk kemi asnjë prononcim për ndryshimin e paraqitjes. Ndërsa i kthehemi këngës, një komentues shkruan: “Domethënë “twerking” e paskemi shpik ne!”.
Bashkëpunimi i tij me Elvana Gjatën në vitin 2009 me këngën “Të dy” dhe “Mamës”nxiti edhe zërat e shumtë për një lidhje të mundshme mes dy këngëtarëve. Fotot e tyre u publikuan kudo, por ata nuk pranuan asgjë.
Me siguri e kishit harruar këngën “Krejt e din”, mes Ghetto Geasy dhe Genta Ismajlit, por pavarësisht se kanë kaluar rreth 9 vite njerëzit në internet shkruajnë se vazhdojnë ta dëgjojnë.
Një nga hitet absolute ishte ajo e Tingulli Trent dhe Ermal Fejzullahu, “I kom”, në vitin 2010. Klipi tërhoqi vëmendje sepse tregonte për meshkujt e rrethuar nga femra të veshura me bikini, të cilave mund t’i ofrojnë gjithçka.
Më pas nisi një fazë e re në karrierën e tij me muzikën: krijimi i grupit diskografik “Babastars” dhe ndryshimi i rrymës së muzikës duke iu drejtuar më shumë repit.
Nga nisja e sagës “High” nga viti 2012 deri në 2017-n dhe prezantimi i Getoarit me epitetin MMV (Më i Madhi në Vend), që pas publikimit të bashkëpunimit me Tunën me hitin me të njëjtin titull.
Për të vijuar më pas me hitet e fundit “Ajo”, një bashkëpunim me Majk, që na fiksoi të gjithëve shprehjen: “T’lagi me shampanjë”.
Burimi: Iconstyle.al
*Ndalohet ribotimi i artikullit pa lejen e redaksisë
