Mund të quhet një nga intervistat më të sinqerta që kam bërë dhe e them me plot vetëbesim se Xhesika Polo është një vajzë mjaft e drejtpërdrejtë, që ta thotë në sy atë që ndjen. Kjo gjë shpesh i ka krijuar edhe armiqësi, thotë ajo në një intervistë për Iconstyle.al, por siç edhe shton, sa më e vërtetë të jesh me të tjerët, aq më mirë.
Xhesika foli hapur për Iconstyle.al, pasi çdo intervistë sipas saj është në të mirë të vetë artistit dhe reklamë për të. Madje edhe skupet apo antireklama, janë reklama më e mirë, ndaj dhe kjo intervistë përmban disa të vërteta , që jo çdo këngëtar do të guxonte t’i thoshte.
E zhgënjyer nga mënyra e trajtimit të artistëve të rinj në Shqipëri, Xhesika zbuloi se mendon largimin nga Shqipëria. Ajo i ka drejtuar shpresat drejt Gjermanisë, ku do të marrë pjesë në një kompeticion muzikor, për t’u vlerësuar ashtu siç duhet. Duke sjellë shembullin e Elhaida Danit, Xhesika pranoi “të vërtetën e hidhur”, që Elhaida u vlerësua në Shqipëri vetëm pasi Italia e shpalli fituese, edhe pse është një artiste e shkëlqyer.
Pavarësisht se ka fituar 4 çmime në Këngën Magjike, Xhesika thotë se në këtë festival është krijuar një lloj monopoli mes këngëtarëve dhe votimi bëhet si pazar. Ajo tregon edhe një episod me këngëtaren Rovena Dilo, që e zhgënjeu kur e vlerësoi gojarisht për këngën, por në fund e votoi me 0 pikë.
Xhesika zbulon se ka bërë shumë kompromise në Shqipëri, një prej të cilëve ka qenë ai për muzikën komerciale popullore, të cilën e këndon sepse jeton në një vend ku pëlqehet muzika folklorike, por nuk e gjen veten te kjo lloj muzike. Ajo gjithashtu na premtoi se do të bëjë sërish një “skandal” për t’u përfolur, pasi sipas saj, kjo është e vetmja mënyrë për të marrë vëmendje.
I vetmi kompromis që Xhesika nuk ka bërë, është të tregojë identitetin e njeriut që i ka marrë zemrën, duke respektuar kështu vendimin e tij për të mos u bërë publik. Këto dhe shumë të pathëna në lidhje me projektet e saj, ndërhyrjet estetike dhe shumë të tjera, mund t’i lexoni më poshtë në intervistën e plotë me këngëtaren Xhesika Polo.
Intervista e plotë me këngëtaren Xhesika Polo:
Me çfarë projekti po merresh aktualisht?
Unë aktualisht do të nxirrja një këngë, por nuk e nxora dot sepse pata shumë punë të tjera dhe çdo gjë merr kohën e vet. Në momentin që nisem të bëj një projekt ose duhet bërë siç duhet, duhet punuar 10 orë në studio ose hiç, dhe në momentin që nuk e kisha atë hapësirë e shtyva për më vonë pasi çdo gjë do investim, para. Vera është periudha e artistëve, këngëtarëve, të paktën për ne që këndojmë live, që kemi punën më të madhe.
Po përpiqem që të dal jashtë, sepse kam qenë në Gjermani disa herë dhe një plan jo shumë afatgjatë e kam që të shkoj të bëj një provë në “German’s Got Talent” ose “The Voice”, apo “X Factor” andej, sepse sinqerisht Shqipëria më ka lodhur. Në momentin që jep shumë dhe ajo që merr nuk e kompeson as gjysmën e asaj që ti jep, për mendimin tim është lodhje kot. Unë e dua shumë vendin tim edhe njerëzit që më përkrahin, por kur e mendoj që ka shumë më shumë mundësi, hapësira dhe vlerësim jashtë kufijve them, pse jo.
Mendon se nuk vlerësohesh sa duhet këtu në Shqipëri?
E vërteta është që kështu ka ndodhur gjithmonë. Ne kemi pasur raste konkrete si Elhaida Dani, këngëtarja e shkëlqyer, artiste e mrekullueshme, që në Shqipëri nuk e vlerësoi asnjë njeri. Kur e panë pastaj që mori famë edhe fitoi “The Voice”, ju tërhoqi vëmendjen, sepse në Itali janë njerëz që e vlerësojnë artin, ata nuk vlerësojnë pornografitë edhe pseudokëngëtaret shqiptare. Ajo atje u vlerësua, këtu ishte nën hije, ajo e di shumë mirë. Të gjithë njerëzit, që e kanë përjetuar atë periudhë e dinë shumë mirë që Elhaida nuk është vlerësuar në Shqipëri. Kjo është e vërteta e hidhur.
Ndaj, kontaktet me jashtë i kam nisur, kam njerëz në Gjermani që po më ndihmojnë të lidhem me produksionin dhe së shpejti do të ik vetë ne Gjermani. Po se provove s’ke asgjë për të humbur.
Do jetë një hap shumë i mirë, kam nevojë për një ndryshim në jetën time. Kam bërë shumë kompromise në Shqipëri për muzikën komerciale popullore, se kur je në shesh nuk ke çfarë të këndosh. Në shesh nuk ka njerëz që duan Tina Turner,Pink, duan muzikë shqiptare dhe nuk është se i gjykoj absolutisht. Në fund të fundit ne jetojmë në një vend me muzikë folklorike, që unë mund t’i këndoj por jo me shumë dëshirë sepse nuk jam rritur me atë lloj muzike. Dhe normal që nuk pretendoj të dëgjoj Shkurte Vejzën, me gjithë respektin se ajo është muzikë , që nuk e bëjnë dot të gjithë. Edhe unë gjej vështirësi.
Sa i përket “Këngës Magjike”. Këtë vit dimë që do të vish me një duet…
Unë kam një duet për “Këngën Magjike”. Do bëj një klip vetëm, po punoj me producent vëllain tim që më ka bërë dhe këngën “Eva jam unë”. Emrin nuk po e them , pasi sa herë i kam thënë gjërat nuk janë bërë. Personi është mashkull, tani dihet se dy goca në duet rrallë dalin (qesh).
Nuk e di po me gocat kam një urrejtje në distancë, ndoshta ngaqë jam natyrë shumë e sinqertë edhe nëse nuk më pëlqen një gjë e them. Para ca kohësh dhashë një intervistë dhe fola për pseudovipat tanë, që nuk më pëlqejnë në asnjë pikë edhe kushedi sa më urrejnë tani.
Cilët janë këta pseudovipa shqiptarë?
Spikata katër kokrra, Xhesika Ndojën, Luana Vjollcën, Gugun, Kallashin që e dridh mirë por kaq. Jam dakord që çdo person ka atë riskun e vet si i thonë në zhargonin shqip, por kur atë riskun nuk e ke të merituar dhe e merr me dhunë më mirë rri në shtëpi e mos i zër vendin një personi që e meriton, shumë e thjeshtë.
Ndonjë bashkëpunim me ndonjë këngëtar shqiptar?
Unë personalisht dal me flamur për Aurela Gaçen , që ka qenë e para që më ka vlerësuar me shpirt dhe gjithë fuqinë e vetes së saj. Unë isha 15 vjeç dhe ka qenë e para që më hapi rrugë pas “X Factor”.
Kam respekt pa fund për atë si njeri në radhë të parë, sepse të bësh një duet nuk do të thotë thjesht të dalësh dhe ta këndosh këngën, por duhet kimia me artistin tjetër sepse ti jep një pjesë nga copëzat e artit tënd dhe nëse nuk ke një feedback të mirë, do dalë një gjë e sajuar.
Nga meshkujt do të veçoja Alban Skënderajn, Alban Ramosajn që e kam shok prej vitesh dhe që në fillim të karrierës e kam mbështetur shumë. Do të veçoja nëse do ishte gjallë, Ergi Dinin, por që jeta ka të papritura. Nga kosovarët më pëlqen Lumi B dhe Seven Saraçi. Por nuk i dihet, po na i dëgjuan thirrjen le të na marrin në telefon. (qesh)
u
Çfarë mendoni për fenomenin e “Balenës Blu? Ju vetë u kontaktuat…
Mua më kontaktoi kjo “Balena Blu”. Unë jam e informuar për këtë pjesë dhe normalisht që nuk kam për të rënë pre e një gjëje të tillë, por ka fëmijë, adoleshentë, që nuk janë të informuar dhe i tërheq ajo lojë siç ka ndodhur në shumë raste. I dërgova një mesazh dhe i thashë që bëj kujdes para se të të gjej unë apo policia dhe menjëherë faqja që më shkroi mesazhin e ndërroi emrin. “Balena Blu”është aplikacion, ai që e ka shpikur i pari ka qenë rus edhe nuk ka lidhje fare me këtë që po ndodh tani. Kjo që po ndodh tani është një abuzim dhe janë njerëz të shpifur, çnjerëzorë që gjejnë mënyra për të mbushur ditën. Personi që më kontaktoi kishte mbi 100 ndjekës.
Ndonjë këshillë për të rinjtë që tërhiqen pas këtij aplikacioni?
Unë faktikisht kam pasur edhe një rast në rrethin tim. Ka qenë vëllai i një shoqes sime, mosha 11 vjeç, target grupi zakonisht janë moshat më të vogla. Unë personalisht mendoj që është shumë e vështirë t’i evitosh kontaktet me internetin, por për brezin e ri duhet bërë kujdes, në momentin që e shohin që ka probleme shoqërore, më mirë stepu, sepse kurioziteti vret siç ka vrarë sepse të manipulojnë. Ka 50 sfida kjo lojë, njëra prej të cilave është zgjohu në 4:00 të mëngjesit dhe shih filma horror. Automatikisht truri manipulohet. Vetë krijuesi kishte thënë një shprehje mjaft psikopate: “E shpika lojën që të hiqja mbetjet biologjike shoqërore”. E kupton se ku arrin truri i njeriut! Është kriminel!
Djali në fjalë nuk kishte folur, por nga rrethi shoqëror ia kishin fiksuar. Unë isha një natë te shtëpia e shoqes sime dhe çohet djali duke ulëritur e duke qarë dhe e mora, i fola, e qetësova dhe i thashë nuk ka ndodhur gjë, duhet ta harrosh. Jemi një vend i vogël, lajmet përhapen shpejt edhe unë vetë bëra një status në “Facebook” dhe pati shumë feedback. Pati dhe njerëz që thoshin, na jep emrin ta kontaktojmë dhe sigurisht u bëra report atyre njerëzve. Unë harxhova kohën time, për të dhënë një mesazh të mirë dhe ajo tjetra tha: I thuaj “Balenës” të më kontaktojë. Kur ka raste që adoleshentë kanë vrarë veten, vetëm si lojë nuk mund të konsiderohet.
Si erdhi ideja e këngës së iPhohe?
Ajo ka marrë më shumë shikime se këngët e mia. Unë isha me një mikun tim Aleks. Dhe po punonim për një tekst kënge edhe na kontakton djali i Seen.al, të cilin e kemi mik. E xhirova këngën, tekstin e kishte bërë ai dhe ia dërgova. Kur shoh e kishte publikuar. Iu përshtata pak Manjola Nallbanit dhe të kënduarit të atyre viteve po ishte super. Janë gjëra që ne i jetojmë, të gjithëve u ka rënë telefoni, edhe pse mua jo pasi jam shumë e kujdesshme.
Nuk jam maniake e teknologjisë, më duket humbje lekësh dhe është kot të jesh fanatik, por unë jam e fokusuar te gjërat më esenciale, si flokët për shembull, që i ndryshoj pafund dhe shpenzoj shumë.
Cila është ndërhyrja e fundit estetike që ke bërë?
Vetullat. E para dhe e fundit. Nuk jam penduar. Jam kënaqur pafund sepse zgjohesha në mëngjes me gjysme vetulle duhej një orë të bëja gjysmën tjetër dhe një orë të vishesha edhe tani do të fle një orë më shumë. Kur e kam parë vetullën time në fund isha njeriu më i lumtur në botë. As kur kam marrë çmim në “Këngën Magjike” nuk kam qenë kaq e lumtur.
Ke në plan një ndërhyrje të dytë?
Kam në plan të bëj gushën dhe kur ta bëj do ta them, sepse pak kohë më parë bëra aksidentalisht një post në “Instagram” që kisha bërë buzët. Një shoqja ime kishte bërë hundën edhe unë i çoj një foto në “Instagram” por ngaqë nuk dija fare ta përdorja “Insta Story”-n dhe postova një foto të buzëve me “fillers” dhe e kam mbajtur 8 minuta. Më pas e nxorën portalet: ” Xhesika e pranon ndërhyrjen! ” Unë kështu i kam pasur gjithë jetën buzët.
Po lajmet për zhveshjen në “Festivalin Kombëtar” si i prite?
Unë e fitova Festivalin Kombëtar për arsyen se për të gjithë karrierën time 5 vjeçare ishte hera e parë që 3 ditë rresht flitej vetëm për mua. 88 portalet që ndjek shkruanin: “Fotot +16, Xhesika skandal”. Kuptova një gjë që nuk isha mësuar të merrja vëmendje për gjëra që unë s’kam dashur të jem në vëmendje. Fustani kishte një qëllim tjetër artistik. E pranoj që kam qëndruar pak rëndë në kamera, se harrova që isha në kamera dhe ky ishte gabimi im i vetëm. Kjo u keqinterpretua. Po unë jam natyrë që prekem shumë dhe 3 ditë rresht nuk kam fjetur fare (qesh).
Po prindërit e tu si i pritën këto lajme?
Një ditë isha duke pirë kafe me babin në një lokal edhe ishin disa burra duke bërë muhabet, në moshë 50-60 vjet. Edhe thotë njëri: “Takova filan aktor dhe më tha kjo vajza që doli lakuriq te festivali meriton burg. Sa vjet burg i tha babi. Aty i vura kapakun. ” E ke seriozisht ?! ”
Gjithë mllefin e jetës e kishin shprehur në komente dhe unë do e bëj kështu në çdo festival, tani do të nxjerr ndonjë gjë që të mbahem mend. (qesh).
Faktikisht babi u mërzit pak se prindërit janë natyrë tjetër edhe pse nuk janë prindër standardë, sepse janë mendjehapur dhe janë mësuar pavarësisht se ishte hera e parë që ndodhte në këto përmasa. Unë i thashë vetëm një gjë: “Mos ju komento njerëzve”!”Mos e bëj kurrë, mos u ekspozo se aq duan”.
Edhe ti kisha paguar s’do më vinin aq shumë ndjekës. Antireklama është reklama më e mirë që mund të të bëjnë. Kam 4 çmime në“Këngën Magjike” dhe sërish rekomandimi i parë i Google është “Xhesika Polo zhvishet”.
E ke menduar veshjen e radhës në festival?
Faktikisht herë e fundit nuk ishte ideja ime. Ishte një vajzë që unë e kam pasur stiliste dhe në “Këngën Magjike” vitin para këtij rasti. Veshjen e festivalit nuk e kisha menduar se këtë vit do të marr pjesë në dy festivale edhe në “KM” dhe në “Festivalin Kombëtar” dhe do bëj dy skandale. Se çfarë pjesë të trupit do të nxjerr nuk e di (qesh). Një gjë do ta bëj, kjo është e vetmja gjë që të përflitesh, le të bësh këngë të bukura sa të duash. Kënga bënte fjalë për një mesazh feminist kundër dhunës së meshkujve ndaj femrave dhe mos justifikimit të saj. Por ky mesazh u zbeh nga fustani.
Sa tatuazhe ke tani?
Tre, një te shpatulla, një te gjoksi dhe një në kurriz. Tatuazhi i parë që kam bërë ka qenë kandili para 4 vjetësh, që ka dy kuptime si tatuazh. Simbolizon njerëzit që ecin kundër rrymës dhe kuptimi që i jap unë është që simbolizon njerëzit pa tru, pa mish dhe pa zemër, si shumica e shqiptarëve me të cilët nuk dua të kem kontakt.
Tatuazhi në shpatull ka qenë një tatuazh tjetër dhe e kam mbuluar me këtë syrin. Ka qenë një shprehje “Devil’s Tears” nga një këngë që e kam pasur fiksim. Po ma kanë nxirë jetën, me atë tatuazh, me thoshin je sataniste. Unë e kisha bërë live tatuazhin dhe mund ta shini në “Youtube”. Ky është syri i tretë, ai i intuitës dhe talentit,“The third eye” që e bëra se më pëlqeu dizajni.
Ndërsa të pjesa e gjoksit zgjodha një tërfil më katër fletë, që konsiderohet fatsjellës dhe fletën e katërt kam bërë dashurinë.
Pse ke vendosur ta mbash të fshehtë dashurinë?
Të them të drejtën nuk është ajo klisheja , që jam personazh publik edhe nuk dua të flas për jetën private. Unë kam një marrëdhënie me një djalë, që e respektoj shumë dhe jam me atë parimin, që sa më shumë njerëz ta dinë, aq më shumë komplikohet marrëdhënia. Aq më tepër kur je personazh publik dhe ke në krah një person që nuk do të jetë personazh publik, që rri me ty se je ti dhe jo Xhesika Polo. Gjëja më minimale që mund të bëj është të respektoj vendimin e tij. Nuk jam natyrë që i mbaj të fshehta gjërat për arsye koti. Prandaj kam fshirë çdo lloj fotoje , se realisht këto gjëra merren dhe abuzohet me to e krijojnë probleme në çift.
Kush ia ka rrëmbyer zemrën Xhesikës dhe a keni ndonjë plan për martesë?
Ai jeton jashtë. Kemi një kohë të mjaftueshme bashkë sa unë ta respektoj. Është herët për martesë, se unë jam 20 vjeç. Unë jam e mendimit që gjërat duhet të ecin në mënyrë spontane dhe graduale, se po hipe nga shkala 1 te 10 thyen turinjtë dhe më mirë ia lë kohës. Për aq kohë që ka dashuri, si me fejesë si pa fejesë unë jam e lumtur.
Ai është një person, që më do kështu si jam e nuk më ndryshon, kjo është e rëndësishme për mua. Një nga kriteret kryesore është të më pranojë si jam. Unë nuk i marr lekë të dashurit, as familjes, të gjitha i kam blerë vetë, makinëndhe tatuazhet. Moshatar nuk është, por është në moshë të tillë sa të mos kemi divergjenca në të menduar. Ai s’merret me muzikë, nuk është këngëtar as intrumentist, as deputet as kriminel.
Cila ka qenë një çmenduri që ka bërë një fansja jote për ty?
Ka qenë një vajzë vjet që më ka ardhur në çdo koncert në turnetë e Shqipërisë. Kudo dhe unë i çoja zemra pafund, më bënte video në çdo qytet. E ka emrin Griselda dhe është e vogël në moshë, është shumë e mirë. Unë s’do e kisha bërë këtë gjë për ndonjë këngëtar.
Kush është idhulli jot?
Unë kam shumë idhuj. Kam disa artistë që i pëlqej për gjëra të caktuara. Pink që e kam dashuruar që në djep, Adele që është e mrekullueshme, Janis Joplin që ka vdekur fatkeqësisht, kam kaq shumë. Aspiroj që të bëj një duet me Pink. Nga shqiptarët më pëlqen ky djali i ri Stanaj, që ka origjinë shqiptare. Madje bëra një video me këngën e tij dhe e kishte pëlqyer vëllai i tij.
Artistët e rinj kanë shumë nevojë për përkrahje. Por në Shqipëri njerëzit janë indiferentë. Në “Këngën Magjike”, për shembull është krijuar një lloj monopoli. “KM” është i vetmi episod që kuptoj se këngëtarët qëndrojnë të dyzuar, se kisha 0 pikësha pafund dhe 30 pikësha. Nuk kishte të mesëm.
A krijon “armiqësi” votimi atje dhe sa të vërteta janë votimet në spektaklet në Shqipëri?
Votimet në Shqipëri nuk janë asnjëherë të vërteta. Unë vij nga “X Factor”, që është një lloj kompeticioni i ngjashëm me “The Voice”, që bazohet në votat e publikut. Por nga hulumtimet, që kam bërë nuk ka rezultuar 100% transparente. Megjithatë është më mirë të votojë publiku, sesa kur u lihet në dorë këngëtarëve si te “Kënga Magjike”, që votojmë njëri-tjetrin, unë e kam shok këtë,do t’i jap më shumë pikë, më dha zero-do t’i jap zero, është pazar, sado të përpiqesh të qëndrosh objektiv në çdo lloj vendimi që do të marrësh, të tregohesh artist realisht,është e pamundur. Unë s’e kam bërë dot, kam qenë në “KM” dhe 30 pikëshin tim e kam parë më të arsyeshme t’ia jap një personi që realisht e vlerësoj në shumë fusha. Ndoshta nuk ishte kënga më e bukur, por unë ndoqa rrjedhën. Ardit Gjebrea tha: “Votoni kë të doni”. Votova Aleksin.
Kur u mblodhëm ne finalistët në” Këngën Magjike”,më tha Arditi, të cilin e dua dhe më do pa fund dhe ka luftuar që unë të fitoja në “X Factor “dhe këtë e kam marrë vesh më vonë, kur jemi bërë më miq:
” Xhesika çfarë ishte ai votim se të gjithë reaguan kur ti dhe 30 pikëshin tënd? ”
Unë i thashë: “Më fal Ardit të të bëj një pyetje, ti ke thënë që artistët e kishin vetë në dorë dhe votuan këtë donin”. Vendimi im nuk ishte aspak objektiv, unë nuk pranoj që votova këngën më të mirë. Por votova atë që doja, shokun tim të ngushtë që më ka bërë tekstin e këngës, që është artist i vërtetë dhe shumë i mirë që e respektoj dhe e vlerësova. Arditi ndoshta më urren tani, se di.
Më tha dhe Kastro Zizo: “Pse më ke dhënë 0 pikë ti “? “Më fal po ti sa më ke dhënë”, i thashë? “Po ç’rëndësi ka kjo”, tha. 0 më dha 0 i dhashë, është e thjeshtë.
Ka pasur momente hatërmbetjeje me ndonjë këngëtar për mënyrën e votimit?
Ka qenë një këngëtare, që unë e kam pasur fiksim që e vogël. Ishte “Kënga Magjike” e dytë që unë merrja pjesë, ku kam marrë dhe çmimin “Best Vocal” edhe ishim në prova gjenerale ku një ditë më pas do të votonim. Më vjen këngëtarja shumë e respektueshme nga publiku shqiptar, Rovena Dilo. Unë para një viti kisha bërë duet me të në “100 Vjet Muzikë” dhe kishim marrëdhënie shumë të mirë dhe unë i kam pëlqyer gjithmonë këngët e saj sepse ka qenë gjithmonë në stadin e një këngëtareje reale dhe jo performuese dhe për këtë kategori kam shumë respekt.
Më vjen Rovena dhe unë nuk e harroj kurrë, pasi ky mund të jetë një nga veprimet më të shëmtuara në karrierën time. Pasi mbaroj performancën ajo më thotë: “Xhesika ishe shumë mirë, më ke pëlqyer pa fund!” Pas tre ditësh ishte finalja ku do dilnin votimet. Del Rovena dhe mendova se më ka votuar përderisa më bëri vlerësim! Dolën pikët e para dhe unë nuk isha ndaj mendova se do jem të pikët maksimale, kur shoh, 0 pikë.
Nuk më dilte inati dhe unë i dhashë pikë vetëm se ishte Rovena Dilo, megjithëse kënga që kishte “Ne do të puthemi”, nuk ishte këngë për të. Rovena Dilo është super artiste dhe unë prap e votova. Dhe unë i thashë vetëm një gjë, e mora veç dhe i thashë: Faleminderit! Unë vazhdoj ta gjykoj atë veprim, që ka bërë por unë e kam jetuar vetë dhe në një farë mënyre, gjysmën e pikëve që ne japim është i ndikuar edhe nga producenti që ka bërë këngën edhe nga menaxheri edhe nga shumë komponentë që ndikojnë në atë votim. Por nuk justifikohet fare fakti që ti më vjen mua, ose më korrekte është te mos ma shprehësh fare simpatinë ndaj këngës dhe të më japësh 0 pikë. Unë jam shumë e qetë dhe shumë e lumtur! Por kur ti tregohesh hipokrite me mua. i ul pikë vetes tënde jo mua!” Unë çmimin e mora edhe me 0 pikëshin e Rovenës, se nuk ka njeri që ti mohon meritat”. Por është një artiste që unë e kam dashur që e vogël dhe kupton që njerëzit nuk janë aq të mirë në jetën reale. Kështu unë vitin tjetër i dhashë 1 pikë.
Burimi: Iconstyle.al
