Në TikTok, njerëzit po i pyesin burrat në jetën e tyre se sa shpesh mendojnë për Perandorinë Romake dhe kjo është shumë më tepër nga ç’e prisnim! Shumë nga burrat e pyetur thonë se kanë mendime të përditshme për Romën e lashtë.
Hashtagu #romanempire tani ka 1,1 bilionë shikime, me video të panumërta kushtuar fiksimit të meshkujve me historinë.
Trendi nisi nga një influencues në rrjete sociale, i cili bënte skeçe ku shfaqej si një Gladiator.
“Zonja, shumë prej jush nuk e kuptoni se sa shpesh mendojnë burrat për Perandorinë Romake. Pyetni bashkëshortin/të dashurin/babain/vëllanë tuaj – do të habiteni nga përgjigjet e tyre!”- tha ai, ndërsa përgjigjet e kësaj pyetje vërtetë çuditën rrjetin.
Çdo muaj, çdo javë, çdo ditë… disa herë në ditë! Arsyet e tyre janë të ndryshme: Për arkitekturën fantastike, Koloseun e famshëm, qytetërimin, gladiatorët, ujësjellësit, betonin etj… Lista vazhdon e gjatë!
“Pse të mos mendoj për Perandorinë Romake?”- tha një prej meshkujve të pyetur, duke i lavdëruar romakët për krijimin e ujësjellësve, apo betonin që ripërtërihet vetë, i cili përbën bazën e trashëgimisë arkitektonike të Romës antike
Madje, disa meshkuj kanë nisur t’u flasin partnereve për Perandorinë Romake duke i “detyruar” edhe ato të mendojnë shpesh për #RomanEmpire.
Disa historianë kanë vënë në dukje se Perandoria Romake – e cila ishte dominuese deri në rënien e saj në 476 pas Krishtit – nuk është vetëm për burrat, pavarësisht nga ajo që mund të sugjerojë trendi.
Ata treguan se kultura popullore mund të ketë mbitheksuar aspektet që konsiderohen mashkullore, si fuqia ushtarake dhe gladiatorët, duke krijuar një imazh mashkullor të perandorisë.
Por në realitet, në Perandorinë Romake që kishte “forma të shumta mashkullore”, gratë mund të kishin lirinë dhe fuqinë, kishte shprehje dhe identitete të shumta gjinore, si dhe seksualitete të ndryshme, sipas Lewis Webb, një historian i Romës së lashtë në Universitetin e Oksfordit.
Po meshkujt e jetës tënde sa herë mendojnë për Perandorinë Romake, i ke pyetur?
