Një lajm i trishtë ka prekur botën e muzikës shqiptare. Këngëtarja e re nga Kosova, Rinesa Qeriqi, e njohur për publikun me emrin artistik Rinesancë, është ndarë nga jeta në moshën vetëm 25-vjeçare, pas një beteje të gjatë me një sëmundje të rëndë.
Lajmin e dhimbshëm e ka bërë të ditur familja e artistes, e cila prej kohësh po përballej me një tumor në tru.
Për shkak të gjendjes së rënduar shëndetësore, më herët ishte organizuar edhe një aktivitet për mbledhjen e fondeve, me synimin për të ndihmuar në mbulimin e shpenzimeve të trajtimit mjekësor.
Por, pavarësisht përpjekjeve, 25-vjeçarja nuk arriti ta mposhtte sëmundjen.
Një nga dedikimet më prekëse ka ardhur nga motra e saj, e cila përmes një postimi në rrjetet sociale i ka dhënë lamtumirën Rinesës me fjalë që dëshmojnë dhimbjen e madhe të familjes.
“Mëngjesi i sotëm na erdhi pa ty Rina jonë. Do të mbetesh gjithmonë në zemrat tona, deri në përjetësi. Të duam fort, unë, mami, babi, Buna e Froni. Pusho e qetë shpirt i bardhë”, shkroi ajo.
Rinesancë ishte një nga artistet e reja që kishte zgjedhur muzikën si mënyrë për të shprehur emocionet, përjetimet dhe historitë e saj personale. Ajo eksperimentonte kryesisht me rrymat hip-hop dhe rap, duke sjellë tekste të ndjera dhe një stil autentik.
Në dhjetor të vitit 2025, këngëtarja publikoi albumin e saj me 12 këngë, të titulluar “Muzikë Mbijetese”, një projekt që sot merr një domethënie edhe më prekëse, duke pasur parasysh betejën që artistja po kalonte.
Edhe pse jeta e saj u ndërpre në një moshë kur ëndrrat dhe planet për të ardhmen sapo kishin nisur të merrnin formë, Rinesancë la pas muzikën e saj dhe kujtimet te njerëzit që e deshën.
Një zë i ri që u shua shumë herët, por që do të vazhdojë të jetojë përmes këngëve të saj.
