Duhej një aktore indiane, mijëra kilometra larg Shqipërisë, për të thënë ato fjalë që shumë prej personazheve të njohur shqiptarë nuk kanë guxuar t’i shqiptojnë prej 141 ditësh.
Sara Khan, e njohur për publikun shqiptar si Sadna e serialit të famshëm “Bidaai”, ka reaguar për situatën e rëndë që po kalon vendi, duke shprehur shqetësimin e saj për të rinjtë, familjet dhe dhunën që ka shoqëruar protestat.
Në një kohë kur protestat kundër qeverisë kanë mbyllur ditën e 141-të dhe prej pesë ditësh janë përshkallëzuar pas bashkimit të studentëve dhe gjimnazistëve, aktorja indiane ka zgjedhur të mos heshtë.
Pamjet e të rinjve të goditur, të tërhequr zvarrë dhe denoncimet e shumta për dhunë policore kanë ngritur shqetësime serioze mbi mënyrën se si po trajtohen protestuesit. Ndërkohë, kryeministri Edi Rama vijon të refuzojë dorëheqjen, pavarësisht revoltës dhe kërkesave të protestuesve për largimin e tij.
Pikërisht në këtë situatë, Sara Khan ka publikuar një mesazh që nuk flet për politikë apo parti, por për njerëzit dhe dinjitetin e tyre.
“Të dashur shqiptarët e mi, ju më mirëpritët në shtëpitë tuaja si Sadna dhe më dhatë kaq shumë dashuri, përtej gjuhës dhe distancës, që nuk dukeshin se kishin rëndësi. E kam mbajtur atë dashuri me vete që atëherë.”
Aktorja kujton lidhjen e veçantë që krijoi me publikun shqiptar përmes serialit të saj, por këtë herë nuk u drejtohet shqiptarëve për t’i falënderuar për popullaritetin. U drejtohet sepse është e shqetësuar për atë që po ndodh me ta.
“Sot zemra më rëndohet kur mendoj për ju, veçanërisht për të rinjtë tuaj, shpresat e tyre dhe familjet që presin të kthehen të sigurt në shtëpi.”
Fjalët e saj marrin një peshë të veçantë në një vend ku prindërit kanë parë pamje shqetësuese të përplasjeve mes policisë dhe të rinjve, ndërsa studentët dhe gjimnazistët janë bërë pjesë e një revolte që ka përfshirë rrugët e kryeqytetit.
“Ka diçka thellësisht të dhimbshme kur zemrat e të rinjve duhet të mbajnë kaq shumë frikë, ndërkohë që duhet të kenë kaq shumë gjëra për të pritur nga e ardhmja. Çdo i ri meriton të ndihet i dëgjuar, të trajtohet me mirësi dhe dinjitet dhe të besojë se ka vend për ëndrrat e tij në vendin e vet.”
Në përfundim, ajo u dërgoi një mesazh mbështetjeje të gjithë atyre që po përjetojnë pasojat e tensioneve.
“Do të doja që këto fjalë t’i sillnin sadopak ngushëllim kujtdo që po vuan. Çdo prind i shqetësuar, çdo i ri i frikësuar dhe kushdo që po përballet në heshtje me vështirësi, dijeni se jeni në mendimet dhe lutjet e mia.”
Por ndërsa Sadna e “Bidaai-t” gjen fjalë për dhimbjen e shqiptarëve, ku janë VIP-at tanë?
Ku janë këngëtarët, aktorët, moderatorët dhe influencerët që çdo ditë mbushin rrjetet sociale me reklama, luks, pushime e bashkëpunime, por nuk gjejnë as pak sekonda për të folur për atë që po ndodh në rrugët e vendit të tyre?
Vetëm pseudo-VIP-at shqiptarë, që e kanë çdo ditë përpara syve dhe po e jetojnë bashkë me popullin çdo moment, ende s’kanë gjetur asnjë fjalë për protestat, dhunën barbare të denoncuar ndaj qytetarëve dhe një mënyrë qeverisjeje njësoj si praktikat e regjimeve autoritare!
Janë po këta personazhe që kërkojnë mbështetjen e publikut për çdo këngë, film, spektakël, produkt apo biznes. Por kur një pjesë e atij publiku del në rrugë, kur studentët kërkojnë të dëgjohen dhe kur familjet shqetësohen për sigurinë e fëmijëve të tyre, shumë prej tyre zgjedhin heshtjen.
Askush nuk u kërkon të bëhen pjesë e një partie apo të mbështesin dhunën në protesta. Por të dënojnë dhunën ndaj qytetarëve, të kërkojnë respektimin e të drejtave të njeriut dhe të shprehin solidaritet me të rinjtë nuk duhet të jetë një akt guximi i jashtëzakonshëm.
Ironia është e hidhur: një aktore indiane, që shqiptarët e njohën përmes ekranit, po tregon më shumë interes publik për fatin e tyre sesa shumë prej atyre që jetojnë çdo ditë nga vëmendja dhe dashuria e këtij publiku.
