Ashtu siç ishte paralajmëruar, spektakli i kërcimit “Dancing With the Stars” do të nisë në muajin tetor.
Ndërkohë së fundmi faqja zyrtare në Instagram e emisionit ka bërë të ditur edhe datën e mbrëmjes së parë të spektaklit të kërcimit.
Me një mini-performancë nga të gjithë konkurrentët e spektaklit, produksioni lajmëron se netët live do të nisin më 7 tetor.
Faqja zyrtare e programit ka zbuluar tanimë edhe emrat e konkurrentëve që do të marrin pjesë dhe kryetarin e jurisë Kledi Kadiun.
Ndërsa së fundmi qarkulloi në rrjet një tjetër emër si anëtar jurie në programin e kërcimit. Sipas ‘Kryefjala.com’, gazetarja dhe opinionistja Dalina Buzi do t’i bashkohet “Dancing With the Stars”, si anëtare jurie, ndërsa nuk ka ende një reagim nga vetë Buzi.
Bora Zemani dihet që do të jetë prezantuese e “Dancing With The Stars” dhe këtë gjë e konfirmoi vetë ajo në një video në Instagram, disa kohë më parë. Mirëpo, është raportuar se edhe Donald Veshaj do të jetë bashkëprezantues në spektaklin e kërcimit, konkretisht në “Gold Room.”
Konkurrentët e spektaklit janë: Alban Nimani, Sara Hoxha, Isli Islami, Megi Pojani, Ardit Çuni, Deborah Keçi, Salsano Rrapi, Irini Qirjako, Arbër Çepani, Elhaida Dani, Ilir Dushkaj, Elona Duro dhe Gent Hazizi.
Sa i takon kryetarit të jurisë, do të jetë koreografi i njohur dhe balerini Kledi Kadiu.
Kledi Kadiu, balerin profesionist, sot mësues i vlerësuar, prej shumë vitesh jeton në shtetin fqinj Itali.
