Ministrja e Shëndetësisë dhe Mbrojtjes Sociale, Ogerta Manastirliu, ka njoftuar se në karantinën e dytë për të prekurit e Covid-19, në spitalin “Shefqet Ndroqi”, janë vendosur 5 respiratorë të rinj.
Ata janë vetëm një pjesë e 54 respiratorëve të rinj të porositur, siç njoftoi më herët Manastirliu. (Lexo këtu)
Ministrja u shpreh se pritet të lëvrohen edhe pjesa tjetër e respiratorëve, ndërsa pas tyre do të kemi edhe respiratorë të tjerë sipas porosive.
“Sot kemi një lajm të mirë. Nga financimi i qeverisë shqiptare dhe kontrata e lidhur tashmë kanë ardhur dhe janë vendosur sasia e parë prej 5 respiratorësh të rinj në spitalin ‘Shefqet Ndroqi’, ndërkohë që priten të lëvrohen edhe pjesa tjetër. Në total kemi 54 respiratorë në dërgesën e parë dhe më pas do të kemi edhe 50 të tjerë e kështu me rradhë, sipas porosive”, u shpreh Manastirliu në një komunikim me ekipin e mjekëve dhe infermierëve të “Shefqet Ndroqit.”
Rikujtojmë se respiratorët në vendin tonë vazhdojnë të jenë në numër minimal për të përballuar situatën e Codiv-19.
Sistemi shëndetësor italian kishte në gjendje 3000 të tillë dhe hapi një tender për 5000 respiratorë të tjerë për të përballuar fluksin e pacientëve me probleme të theksuara të frymëmarrjes, ndërsa situata e Shqipërisë mbetet ende me pikëpyetje.
