35 kilometra larg kryeqytetit, në një lartësi gjeografike mbi 600 metra ndodhet qyteti i Krujës, aty ku skalitet historia e Skëndërbeut dhe vendbanimet e para të fisit të albanëve. Në vitin 2017, Kruja është shpallur qyteti më i vizituara nga turistët, sidomos nga turistët e huaj.
Foto nga Bashkia Krujë
Ndalesa e parë është “Pazari i Krujës”, një ndër gjërat më unike ku shpalosen të gjitha traditat shqiptare. Në rrugën me kalldrëm, dyqanet e vogla janë veshur kuq e zi, si dhe dëshmojnë të kaluarën historike me skulptura të personazheve historikë, qilima e flamuj të punuar me dorë. Rruga vijon në oborrin e kalasë të pasur me histori e kujtime, legjenda e rrëfenja e ku muret vishen me trashëgimininë e të parëve tanë iliras.
Muzeu Historik Kombëtar Gjergj Kastriot Skëndërbeu rrëfen në muret e kalasë, historinë e Shqipërisë të shpërndarë kronologjikisht sipas ngjarjes.
Një ndër vendet më të preferuara për tu vizituar është edhe Muzeu Etnografik, i vendosur në një godinë të vjetër të familjes Toptani në vitit 1764. Muzeu ka formën e një shtëpie të vjetër me mobilje të vjetra, tavan i gdhendur në dru, qilima e veshje tradicionale.
Foto nga Bashkia Krujë
Për të gjithë personat që dashurojnë ngjitjen e malit, Kruja ofron mundësinë e artë. Nga qyteti i Krujës, nis ngjitja në këmbë për në majën e malit, në teqen bektashe të Sari Sarisalltikut, një distancë prej 600 metrash. Pasi të arrini në majën e malit, mund të konsumoni drekën e paketuar nën hijen e pemës mbi 500 vjeçare, legjenda e së cilës na tregon që ajo u mboll nga duart e Skënderbeut si shenjë dashurie ndaj Donikës.
Foto nga Iconstyle.al
Aty, mbi re, ndodhet teqeja me ngjyrë të bardhë dhe të gjelbër që bëhet motiv për shumë vizitorë. Teqeja është objekti më i dashur i besimtarëve krutanë, bektashinjve në Shqipëri dhe të gjithë turistëve.
Për të vizituar Krujën, nuk duhet patjetër moti i mirë, pasi këtë fundjavë pritet të ketë reshje shiu.
Për imazhe të tjera dhe më shumë informacione, klikoni në http://welcomealbania.al/
