Reperi Noizy ka qenë së fundmi në “Pushime On Top”, ku ka folur për karrierën e tij dhe ka zbuluar detaje nga koncerti i tij “Alpha Show” i cili do të organizohet më 14 gusht në Tiranë.
Mirëpo u tha më herët se Noizy ka menduar që të largohet nga muzika. Si është e vërteta?
“Besoj se jam disa vite larg largimit nga muzika. Nuk besoj se do e le muzikën ndonjëherë. Gjithmonë do të merrem me muzikë. Nëse s’do jem aktiv nëpër koncerte, do jem aktiv duke prodhuar muzikë për artista të rinj. Do bëj këngë, por mbase koncertet i rralloj. Kur të vijë mosha 50 vjeç normal që edhe mund të shkëputem”, tha Noizy.
Po çfarë do të bëjë Noizy pas koncertit? Cilat janë planet e tij?
“Unë po përgatis një album tjetër. Albumi “Alpha” do dali 3 ditë para koncertit. Ndërkohë sapo të mbarojë koncerti do jem në 3 shtete në dy javë.”, është shprehur Noizy.
Mirëpo, jo vetëm kaq por ai tha se albumi i tij i fundit me siguri do të quhej “Ishte kënaqësi”.
“Albumi i fundit do të quhet “Ishte kënaqësi”, shtoi Noizy.
Gjithashtu, Noizy ka rrëfyer edhe pagesat në fillimet e tij.
“Në këtë lloj forme që jam tani nuk e kisha imagjinuar asnjëherë, sepse nuk mendoja kurrë që të ardhurat të ishin kaq të mëdha në një shtet si tonin. Madje mbaj mend në vitet 2005-2006, më rastisi një ditë që realizova 3 koncerte brenda ditës në 3 qytete të ndryshme. Kur u ktheva në shtëpi, më duket se as 1 milion lekë (të vjetra) nuk mora nga koncertet. Aty u dëshpërova shumë. Pastaj në momentin që më thirrën në Europë gjërat ndryshuan, shifrat ndryshuan dhe aty i dhash gaz më fort”, është shprehur Noizy.