Gjykata e Elbasanit sërish ka pësuar “goditje” nga pandemia Covid-19, ku 4 punonjës të kësaj gjykate kanë rezultuar pozitiv me koronavirus. Si pasojë Gjykata e Elbasanit është mbyllur duke pezulluar seaacat gjyqësore.
Ndërkohë bëhet me dije se pozitive me Covid-19 ka rezultuar kryesekretarja, sekretarja dhe dy punonjëse të tjera, teksa tamponi iu mor edhe dy gjyqtarëve.
Kujtojmë se në Elbasan nga Covid-19, janë prekur edhe disa institucione arsimore teksa më së shumti janë infektuar mësues.
Gjithashtu është mbyllur gjatë paradites së sotme edhe reparti i neurologjisë në Spitalin e Beratit, për shkak se një mjeke kishte rezultuar pozitive me Covid-19.
Bëhet me dije se pas testit të covid-19, me koronavirus kanë rezultuar edhe 2 mjeke të tjera dhe 5 infermierë të këtij reparti.
Mësohet se mjekja e cila rezultoi e para me Covid, jetonte në Durrës dhe ishte kontraktuar për të punuar 3 ditë në javë në Spitalin e Beratit për shkak të mungesës së mjekëve specialist.
