Asnjë poster nuk mund të krahasohet me fuqinë e një pikture origjinale, të zgjedhur prej jush, për vendin ku jetoni. Ndërsa hyn në Galerinë Kombëtare për të parë ekspozitën e Arben Golemit, “Tjetërsim”, kupton shumë mirë ndjesinë që të ofron arti i vërtetë. Teksa zgjedh me sy një ndër pikturat që të tërheq vëmendjen kupton se të rifresoket shpirti.
Atëherë mendon pse mos t’i japësh vetes dhuratën e një frymëzimi të përditshëm? Ka diçka kaq emocionuese të pasurit një vepër arti unike në shtëpinë tënde, të një vepre që të lidh apo të ndikon emocionalisht.
Piktura mund të provokojë një emocion universal, siç është dashuria. Dhe këtë e gjejmë në qytetin e Beratit, në atë të Nju-Jorkut, te pyjet apo lulet, në 44 kuadrot e piktorit dhe koleksionistit Golemi.
Mbi 13 vite punë që i japin jetë mureve të galerisë dhe ndryshimi nga njëra pikturë te tjera është e dukshëm. Ky detaj lidhet pikërisht me titullin e ekspozitës “Tjetërsim”.
“Është tjetërsimi i punëve të mia, dëshirës sime për të qenë gjithmonë ndryshe dhe në kërkim. Dhe kur je në këtë gjendje tjetërsohesh në formë, në mendim dhe në koncept”, shpjegon Arben Golemi gjatë intervistës për “Iconstyle”.
Ndërsa për filozofinë e pikturave të tij, artisti thotë: “Unë shpreh vetveten, kontradiktat, idetë, mjetet, formën dhe çdo gjë që ka të bëjë me konceptin tim të përgjithshëm për mënyrën sesi ne jetojmë. Në fund të fundit, ëndrra e çdo autori është që të lë diçka, të jetë i njohur dhe të jetë ndryshe”.
Me përmbledhjen e gjashtë ekspozitat e tij të fundit, atë në Berat, në Pogradec apo ato në Galerinë FAB, Golemi sjell vërtetë tjetërsim.
“Ajo që është pak më ndryshe në këtë ekspozitë nga të tjerat është që unë kam ekspozuar një cikël të grafikeve të mia, pastelet, akuarelet dhe pikturat vaj në letër. Ky i fundit është cikli i “Luleve të Kristalit”, ndërsa të tjerat janë vizatime të impresioneve të miat në Paris, vizatimit të pemëve, Beratit, etj”.
Ndalemi te “Lulet e Kristalit” jo pa shkak. Tre nga mbi 100 pikturat e këtij cikli janë vendosur në krahun e djathtë të ekspozitës, të ndara nga pikturat e tjera. Ato janë shumë të veçanta, sepse i kushtohen të bijës së piktorit. Por përse lulet?
“Natyrat e qeta, lulet, kanë shumë lidhje me femëroren. Pikturat vaj në letër janë piktura që kanë të bëjnë shumë me temperamentin tim, janë piktura me një goditje, që t’i shpreh dashurinë, dëshirën, ngjyrat shpejt, pa e mbajtur gjatë pikturën”.
Pikturat e vërteta kanë një cilësi sepse janë të prekshme dhe kjo i veçon. Duke përshkuar gishtërinjtë te sipërfaqja e tyre përjeton një emocion që vështirë ta shkruajmë me fjalë. Cilësia më e lartë, origjinaliteti dhe historia e veprës origjinale të gjitha ndihmojnë në krijimin e një lidhjeje të fortë emocionale mes pikturës dhe nesh.
“Arti nuk shitet si pastat, apo si frutat, shitet shumë më rrallë dhe shtetet në mënyrë absolute ndihmojnë galeritë e artit kudo në botë, duke i krijuar lehtësira që të përkrahen artistët. Është një proces i gjatë edukimi, të cilin për fat të keq është akoma shpejt për ta realizuar sepse ka të bëjë shumë me ekonominë dhe edukimin. Së pari, Tirana si metropol duhet të kishte një rrjet të galerive të artit, ku mund të shikonin dhe të blinin piktura dhe ku ka autor nga më të ndryshmit të ekspozuar në mënyrë të vazhdueshme”, shprehet Golemi.
Por një nga fenomenet më shqetësuese është ai i blerjes së posterave apo pikturave nga Kina. I pyetur nëse e kanë shqiptarët edukimin e blerjes së pikturave origjinale, artisti tha për “Iconstyle.al”:
“Për fat të keq ka rreth 10 vjet që është një sulm barbar i posterave dhe ca dava pikturave që vijnë nga Kina, ca kopje ordinere që kanë keqedukuar një pjesë të mirë të publikut. Por njerëzit e kulturuar blejnë pikturën e vërtetë padiskutim. Për fat të keq një pjesë e mirë e njerëzve të pasur në Shqipëri akoma nuk janë në nivele që të kuptojnë zhvillimet e artit, jo vetëm në pikturë, por në shumë drejtime të tjera. Mungon një proces edukimi i tillë që them se do të superohet me kalimin e kohës. Dhe kur fëmijët e të pasurve të studiojnë jashtë dhe të kulturohen pa dyshim që do të ndikojnë dhe te prindërit e tyre. Do të kenë në muret e tyre piktura me vlerë dhe do të përkrahin artin”.
Ndërsa falënderon drejtorin e Galerisë Kombëtare, Artan Shabanin, që e përzgjodhi për të hapur ekspozitën e tij në ato ambiente, mund të kuptoni se nuk është aspak rastësi. Puna e Golemit ka treguar vitet e fundit lidhjen e fortë mes pikturës dhe arkitekturës. Ai duket se e ka gjetur shtegun e tij në fushën e pikturës:
“Mjeti është shumë i rëndësishëm për një autor, sepse është personal. Sa më personal të jetë mjeti aq më i veçantë është autori. Kur mjeti përputhet me idenë do të thotë që personalizohet autori. Në pikturë të jesh i veçantë brenda vlerave është një gjë shumë e rëndësishme. Në këtë rast mua më ka përkuar ideja, fryma nga arkitektura me mjetet arkitektonike, rrjetet, vijnë të gjitha nga ndërtimi”.
Arti të përfshin dhe është një nga mënyrat më të mira për të qetësuar shpirtin. Por ajo që e bën më të bukur është fakti kur takoni personalisht artistin Arben Golemi, i cili është i gatshëm t’ju tregojë historitë që ndodhen pas veprave dhe të kuptoni ndjenjat që fshihen pas tyre. Për t’ju ofruar këtë lidhje të thellë personale mes jush dhe veprave të artit dyert e galerisë për ekspozitën “Tjetërsim” të Arben Golemit do të qëndrojë të hapur deri më 23 qershor.
Burimi: Iconstyle.al