Khloé Kardashian ka rikujtuar fillimet e vështira të biznesit familjar DASH, duke zbuluar se ajo dhe motrat e saj nuk kishin aspak përvojë kur vendosën të hapnin butikun e tyre të parë.
Gjatë një interviste të fundit, ajo rrëfeu se bashkë me Kim Kardashian dhe Kourtney Kardashian, u futën në këtë sipërmarrje rreth vitit 2006 pa ditur thuajse asgjë për industrinë e modës apo menaxhimin e një biznesi. “Nuk dinim çfarë po bënim,” pranoi ajo, duke shtuar se në fillim refuzuan edhe idenë për të realizuar një reality show.
Sipas saj, ishte nëna e tyre, Kris Jenner, ajo që i bindi duke ua paraqitur projektin televiziv si një mënyrë për të promovuar dyqanin. Në atë kohë, DASH ishte prioriteti i vetëm për to.
Khloé kujton se në fillimet e para nuk kishin asnjë punonjës dhe bënin gjithçka vetë: nga pastrimi, te taksat dhe organizimi i rrobave. Madje, financimi i parë erdhi nga një kartë krediti e lidhur me babanë e tyre të ndjerë, Robert Kardashian, me një limit prej 50 mijë dollarësh, të cilin e përdorën për të blerë koleksionin fillestar.
Pavarësisht mungesës së përvojës, motrat arritën ta zgjerojnë biznesin në qytete të mëdha si Los Anxhelosi, Nju Jorku dhe Miami. Megjithatë, pas më shumë se një dekade aktiviteti, ato vendosën të mbyllin përfundimisht DASH në vitin 2018, për t’u fokusuar në projekte dhe sipërmarrje të tjera personale.
