Taylor Swift ka treguar një moment shumë emocional në serinë e saj të dokumentarit të ri, “Taylor Swift: The Eras Tour”, ku shfaqet duke qarë para se të dalë në skenë në Londër, duke u përballur me ndikimin emocional të takimit me familjet e viktimave të sulmit me thikë në Southport.
Në episodin e serisë, këngëtarja, e cila është duke udhëhequr një turne të madh në mbarë botën, shfaqet duke qarë në mes të një bisedë të ndjerë me nënën e saj, Andrea Swift. Ajo ka vizituar familjet e viktimave të sulmit, ku tre fëmijë humbën jetën dhe dhjetë të tjerë u plagosën. Ndërsa mundohet të dalë para koncertit në Wembley Stadium, Swift shpërthen në lot, teksa përpiqet të marrë frymë dhe të mbledhë forcë për të dalë përpara 92,000 fansave.
Andrea e qetëson duke i thënë: “E di që i ke ndihmuar ata. E di që nuk duket kështu, por e di që i ke ndihmuar”. Këngëtarja tregon se ndonëse ndjen një realitet të jashtëzakonshëm dhe shpesh të vështirë emocionalisht, ajo ka detyrën që të mbajë një imazh të fortë dhe të vazhdojë performancën. “Është puna ime të trajtoj të gjithë këto ndjenja dhe të vazhdoj menjëherë me performancën,” shprehet ajo.
Sulmi tragjik ndodhi më 29 korrik 2024, kur tre fëmijë humbën jetën gjatë një klase vallëzimi me temë Swift në Southport. Swift, e cila ishte e shokuar nga ngjarja, kishte një mesazh ngushëllimi për fansat pas incidentit dhe tha se ishte e tronditur nga dhimbja që ka shkaktuar sulmi.
Në dokumentar, ajo rrëfen vështirësitë për të dhënë performancën e saj të gjatë dhe presionin që ndjen për të ofruar një natë të paharrueshme për fansat, pavarësisht nga ngjarjet e tmerrshme pas skenës.
