Presidenti i Universitetit të Miçiganit, Domenico Grasso, deklaroi se institucioni që ai drejton ka “zero tolerancë” ndaj sjelljes së ish-trajnerit të futbollit, Sherrone Moore, i cili dyshohet se ka pasur një marrëdhënie të papërshtatshme me një anëtare të stafit.
Më 10 dhjetor, të mërkurën, një hetim i brendshëm i universitetit arriti në përfundimin se ekzistonte “provë e besueshme” që Moore, 39 vjeç, ishte përfshirë në këtë marrëdhënie të ndaluar. Si pasojë, ai u shkarkua menjëherë “me shkak”. Vetëm pak orë më vonë, Policia e qytetit Saline e ndaloi atë, për ta dorëzuar më pas tek autoritetet e Pittsfield Township.
Të enjten, më 11 dhjetor, Grasso publikoi një letër drejtuar stafit dhe studentëve, ku konfirmonte zyrtarisht shkarkimin e Moore. Sipas tij, trajneri ka shkelur qartë politikat e universitetit duke u përfshirë në një marrëdhënie të papranueshme me një punonjëse.
“Nuk ka absolutisht asnjë tolerancë për këtë sjellje në Universitetin e Miçiganit,” shkruan Grasso në deklaratë. “Ky shkelim besimi është i dhimbshëm për komunitetin tonë, mbi të gjitha për personat e përfshirë drejtpërdrejt.” Ai shtoi se universiteti ruan një angazhim të fortë ndaj respektit, integritetit dhe përgjegjësisë, dhe se hetimi i brendshëm vazhdon.
Ndërkohë, më herët të enjten, u publikua audioja e thirrjes së 911-ës të bërë pak para arrestimit të Moore. Në incizim, një dispeçer tregon se një grua kishte raportuar se një “burrë ishte në shtëpi duke e sulmuar” dhe se, sipas saj, ai e kishte “ndjekur prej muajsh”. Edhe pse emri i Moore nuk përmendet, ngjarja lidhet me adresën ku policia thotë se u zhvillua incidenti.
