Sunny Hill Festival, i cili organizohet çdo vit nga Dukagjin dhe Dua Lipa, ka sjellë në Kosovë disa nga emrat më të njohur të muzikës. Në vitin 2019-të, që ishte dhe hera e fundit kur u mbajt festivali, në Kosovë mbërriti Miley Cyrus, Gashi e shumë personazhe të tjerë të famshëm. Sigurisht që ky festival ka ndikuar në rritjen e imazhin të Kosovës dhe e ka bërë akoma më të njohur në mbarë botën, falë këngëtarëve që janë ngjitur në skenën e festivalit.
Mirëpo çfarë do të ndodhë këtë vit me “Sunny Hill Festival”. I ftuar ditën e sotme në emisionin e mëngjesit “Ora shtatë”, në “Klan Kosova”, Dukagjin Lipa tregoi se planet për realizimin e festivalit do të plotësohen në varësi të situatës së pandemisë.
“Planet e saj varen shumë prej situatës me pandeminë. Ne mezi presim të fillojë përsëri Festivali “Sunny Hill. Shpresojmë shumë që Pandemia të qetësohet sepse duhet ta dimë që duhet të jemi të kujdesshëm me festivale. Duhet t’iu përmbahemi rregullave të COVID. Jemi të gatshëm për festivalin por jemi duke e prit vendimin e Kryetarit të Komunës, Shpend Ahmetit, për hapësirën e re të këtij festivali. Do të kemi një lajm të ri për 3-4 ditë për sajtin e festivalit. Veç pandemia mundet me na ndalë, asgjë tjetër”, tha Dukagjin Lipa.
