Janë shënuar vetëm 4 raste të infektuarish me koronavirus në vendin tonë në 24 orët e fundit duke e çuar në 880 numrin total të të prekurve.
Ministria e Shëndetësisë njoftoi sot se rastet e reja janë dy nga Tirana dhe dy nga Berati, ndërsa një prej të infektuarve është një grua shtatzënë. Ndërkohë numri i të shëruarve në 24 orët e fundit është 6, ndërsa 78 për qind e personave të prekur janë shëruar.
Nga totali i të prekurve vetëm 161 të infektuar me COVID-19 janë aktivë në vendin tonë.
Situata në spitale paraqitet e qëndrueshme prej ditësh. Aktualisht në dy spitalet CÒVID janë të shtruar 21 pacientë dhe vetëm 1 prej tyre është në terapi intensive. Nga fillimi i epidemisë, deri tani, në vendin tonë janë kryer 11578 testime, nga të cilat, 11,048 janë testime molekulare dhe 530 janë testime serologjike.
Situata në mbarë botën
Më shumë se 4.26 milionë njerëz në mbarë botën janë konfirmuar me koronavirus, sipas të dhënave të përpiluara nga Universiteti Johns Hopkins. Më shumë se 291,000 kanë vdekur – 82,000 prej tyre në Shtetet e Bashkuara. Gati 1.5 milionë njerëz janë shëruar.
Mbështetja për presidentin amerikan Donald Trump ka rënë në muajin e kaluar pasi numri i të infektuarve nga koronavirusi është rritur, sipas një studimi të Reuters.
Dr Anthony Fauci, eksperti më i lartë i sëmundjes infektive në SHBA, ka paralajmëruar se vendi nuk e ka ende sëmundjen nën kontroll dhe se lehtësimi i bllokimeve shumë shpejt rrezikon vdekje të panevojshme.
Qyteti kinez Jilin ka rivendosur kufizime të udhëtimit, duke mbyllur lagjet dhe ka ndaluar mbledhjet e më shumë se 4 personave pasi një numër i madh rastesh me koronavirus u konfirmuan në qytetin verilindor.
Rusia raportoi 10.028 raste të reja të konfirmuara me koronavirus, duke e rritur numrin e saj mbarëkombëtar në 242,271. 96 njerëz vdiqën brenda natës, duke arritur numrin zyrtar të vdekjeve në 2.212.
Austria dhe Gjermania planifikojnë të hapin kufirin e tyre në 15 qershor pasi u mbyll për dy muaj, tha qeveria në Vjenë.
“Nga 15 qershori, hapja e kufirit midis Gjermanisë dhe Austrisë do të jetë e mundur”, tha ministrja e turizmit Elisabeth Koestinger.
/Iconstyle.al
