Një zhvillim i papritur ka rikthyer në qendër të vëmendjes vdekjen e biznesmenit të njohur spanjoll Isak Andic, themeluesit të gjigantit të modës Mango. Djali i tij, Jonathan Andic, raportohet se është vënë në fokus të hetimeve lidhur me vdekjen e të atit, e cila ndodhi në dhjetor të vitit të kaluar pas një rënieje fatale nga një greminë në zonën malore të Montserrat, pranë Barcelonës.
Ngjarja fillimisht u trajtua si një aksident tragjik, por sipas raportimeve të mediave spanjolle, hetimet kanë marrë një kthesë të re. Autoritetet po shqyrtojnë tashmë mundësinë e një vrasjeje të mundshme, pasi dëshmia e Jonathan Andic është cilësuar si “e paqëndrueshme” dhe ka ngritur pikëpyetje të reja për rrethanat e incidentit.
Pavarësisht dyshimeve që po hetohen, familja Andic ka reaguar duke deklaruar se po bashkëpunon plotësisht me autoritetet dhe se mbështet pafajësinë e Jonathan-it. Deri tani nuk ka akuza zyrtare të konfirmuara publikisht, ndërsa hetimet mbeten të hapura.
Vdekja e Isak Andic kishte tronditur jo vetëm familjen, por edhe botën e biznesit dhe modës në Europë. Ai konsiderohej një nga figurat më të rëndësishme të industrisë spanjolle të veshjeve. Në vitin 1984, ai themeloi Mango, markë që nga një biznes i vogël u kthye në një prej zinxhirëve më të mëdhenj të modës në Europë dhe më gjerë.
Ndërsa hetimet vijojnë, rasti po ndiqet me interes të madh në Spanjë, pasi përfshin një nga familjet më të njohura të botës së biznesit dhe një histori që po ngre shumë pikëpyetje mbi atë që ndodhi realisht në Montserrat.
