Një vatër e tretë e Murtajës së Ruminantëve të Vegjël (PPR) është konfirmuar në Shqipëri, duke rikthyer alarmin tek fermerët dhe autoritetet veterinare. Sëmundja është evidentuar në fshatin Mali Gjymtit, në Njësinë Administrative Dajç të Shkodrës, ku janë prekur dy ferma me bagëti të imta.
Sipas njoftimit zyrtar të Autoritetit Kombëtar të Veterinarisë dhe Mbrojtjes së Bimëve, rastet janë konfirmuar më 15 dhe 18 maj 2026, pas analizave laboratorike të kryera nga Instituti i Sigurisë Ushqimore dhe Veterinarisë. Në dy fermat e prekura ndodheshin gjithsej 112 krerë dele, ndërsa fermat ishin vetëm 40 metra larg njëra-tjetrës.
Menjëherë pas konfirmimit të virusit, strukturat veterinare kanë ndërhyrë duke zbatuar protokollet e emergjencës. Është bërë izolimi i fermave, karantinimi i tufës së prekur dhe dezinfektimi i ambienteve dhe pajisjeve. Si masë parandaluese janë eliminuar 20 krerë dele.
Autoritetet kanë shpallur zonë mbrojtjeje në një rreze prej 3 kilometrash dhe zonë mbikëqyrjeje në 10 kilometra, ndërsa është ndaluar lëvizja e kafshëve drejt tregjeve, kullotave apo fermave të tjera. Gjithashtu, fermerëve u është kërkuar të kufizojnë hyrjen e personave të jashtëm dhe të zbatojnë me rigorozitet masat e biosigurisë.
Gjatë vitit 2025, kjo sëmundje u përhap në pothuajse të gjitha rajonet e vendit, duke çuar në eliminimin e rreth 2200 krerëve bagëti. Vetëm pak ditë më parë, qeveria miratoi dëmshpërblimet për fermerët e prekur nga kjo epidemi.
