Në një kohë kur bota mbarë është paralizuar nga pandemia e COVID-19, kompanitë më të mëdha botërore e po ashtu edhe administratat e shteteve që kanë mbyllur dyert e zyrave të shërbimeve publike tashmë po mundohen të gjejnë mënyra të reja për të zhvilluar në largësi aktivitetet e tyre, për të shamngur një bllokim të përgjithshëm të veprimtarive. Për ta bërë një gjë të tillë, u kanë ardhur në ndihmë aplikacionet e platformat e ndryshme, të ideuara pikërisht për të mundësuar punën në largësi, ose “smart working”, ashtu sikurse deputetët shqiptarë kanë bërë për herë të parë ditën e sotme, e që shpresojmë që ta zbatojnë edhe për institucionet e tjera.
Vetëm pak ditë më parë, CEO i “Facebook” Mark Zuckerberg i ofroi qeverisë amerikane falas për një vit platformën “Workplace”, një zgjidhje optimale për t‘i mundësuar institucioneve të shumta të vijojnë veprimtarinë e tyre në një kohë të tillë emergjence.
Por si funksionon Workplace?
Platforma e ndërtuar në vitin 2015 nisi si ide nga inxhinierët e “Facebook” që për të thjeshtuar komunikimin e ekipeve të tyre, krijuan grupe që ishin të aksesueshme vetëm për personat brenda kompanisë. Tashmë “Workplace” është një version profesional i “Facebook”, që ndihmon punonjësit e kompanive/institucioneve të komunikojnë në mënyrë shumë herë më efektive sesa ç’do të ishte nëpërmjet email-eve. Në murin e postimeve, shfaqen sipas sipas algoritmit të përdorur dhe nga Facebook, postimet me njoftimet e kompanisë. Në grupet e përbashkëta punonjësit mund të ngarkojnë dokumente, të lënë komente dhe të punojnë në grup dhe gjithashtu, “Workplace” lejon përdoruesit të bashkëpunojnë dhe me ekipe jashtë kompanisë së tyre, partnere apo klientë, duke përdorur grupe të mbyllura të sigurta dhe lidhje me video deri në 50 persona.
Më shumë se 38 mijë kompani në mbarë botën me një numër punonjësish që arrin deri në 5000 të tillë përdorin sot “Workplace” për të realizuar në mënyrën më efektive të punuarit në distancë, një çështje që shumë shpejt do të shndërrohet në prioritet dhe në vendin tonë, duke qenë se kriza e koronavirusit nuk ka një datë skadence dhe mund të zgjasë me muaj të tërë.
Aplikacione e programe të tjera të ngjashme
Citrix Workspace
Aplikacioni “Citrix” lejon përdoruesit të aksesojnë çdo aplikacion, desktop apo përmbajtje tjetër, duke u regjistruar me të dhënat personale vetëm një herë, një zgjidhje ideale për të gjithë ata që informacionet e nevojshme për të vijuar punën nga shtëpia, i kanë të ruajtura në kompjuterin e zyrës. Alternativë e ngjashme: Chrome Remote Desktop
Trello
Një program bashkëpunimi që organizpon projektet në seksione të ndryshme dhe të lejon të shohësh çfarë po punohet, kush po merret me çfarë dhe si është ecuria. “Trello” është i përshtatshëm si për punë individuale ashtu edhe për grupe deri në 10 persona.
Zoom
Platformë që lejon telefonata dhe videotelefonata në grup, e ideuar enkas për biznesin. “Zoom” gjithashtu ofron dhe mundesinë e shkëmbimit të mesazheve e dokumentave.
Toggl
Një aplikacion i fokusuar në matjen e kohës që shpenzohet për përfundimin e projekteve apo detyrave specifike. “Toggl” është ideuar për t’u ardhur në ndihmë freelancer-ëve, në mënyrë që të paguheshin në mënyrë më të saktë për kohën e shpenzuar për një detyrë të caktuar, si dhe për t’i ndihmuar ata që të planifikojnë më saktë projektet që marrin përsipër.
Slack
Një version profesional i “Whatsapp”, “Slack” është një platformë mesazhimi që të lejon gjithashtu të ngarkosh dokumente, të ndash ekranin me një bashkëpunëtor, të bësh telefonata dhe videotelefonata etj. Të gjitha këto, pa u ngatërruar me “Whatsapp” që është kryesisht për përdorim personal.
Në ditët që po jetojmë teknologjia ka bërë të mundur një platformë a aplikacion për çdo nevojë të personave që punojnë në largësi, ndaj mjafton një kërkim i thjeshtë për të gjetur diçka që përmbush dhe nevojën më specifike në këtë aspekt. Në kushtet e pandemisë së COVID-19 sigurisht që “smart working” është alternativa e vetme, por a do të vijojë kjo strategji edhe pas përfundimit të emergjencës? Mbetet për t’u parë.
