Teksa lajme të mira raportohen nga Azia, ku situata në Kinë dhe Korenë e Jugut po përmirësohet ndjeshëm, nuk mund të themi të njëjtën gjë për Italinë.
Deri më tani numri i viktimave ka shkuar në 827 persona, ndërsa janë 12,462 të infektuar, nga të cilët 1,045 janë shëruar.
Para 3 ditësh, kryeministri Italian ka shpallur vendin fqinj të gjithin një karantinë, duke ndaluar çdo lëvizje të italianëve.
Pasditen e sotme, Organizata Botërore e Shëndetit ka shpallur Covid-19 një pandemi, teksa bëri me dije se po përhapet me shpejtësi alarmante.
Ndryshimi mes pandemisë dhe epidemisë është se kjo e fundit është një sëmundje ngjitëse ose virale që prek shumë individë në një zonë të caktuar, ndërsa një pandemie është një sëmundje ngjitëse ose virale që përhapet jashtë vendit në të cilin ka ndodhur shpërthimi.
Në vendin tonë virusi trokiti 3 ditë më parë dhe tashmë janë regjistruar 11 të infektuar dhe 1 viktimë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës./ gazetareforma
