Ylli i Real Madrid, Kylian Mbappé, ka pësuar një lëndim muskulor që pritet ta lërë jashtë fushave për pjesën e mbetur të sezonit, sipas një njoftimi zyrtar nga klubi spanjoll. Lajmi vjen në një moment delikat për madrilenët, të cilët po luftojnë për titullin në LaLiga.
Sipas komunikatës së klubit, testet mjekësore kanë konfirmuar një dëmtim në muskulin semitendinosus të këmbës së majtë. Real Madrid ka bërë të ditur se rikuperimi i sulmuesit francez do të monitorohet në mënyrë të vazhdueshme, pa dhënë një afat të saktë për rikthimin e tij në fushë.
Mbappé e pësoi lëndimin gjatë ndeshjes së barazuar 1-1 ndaj Real Betis, një rezultat që komplikon më tej situatën e Real Madrid në renditje. Pas fitores së Barcelonës, diferenca është thelluar në 11 pikë, ndërsa kanë mbetur vetëm pesë ndeshje deri në fund të sezonit, duke e bërë gjithnjë e më të vështirë rikuperimin e kreut.
Pavarësisht këtij zhvillimi negativ, sezoni individual i Mbappé mbetet mbresëlënës. Ai ka realizuar 24 gola në 28 ndeshje në LaLiga, duke qenë një nga kandidatët kryesorë për çmime individuale. Në garën për golashënues, ai ndiqet nga Vedat Muriqi me 21 gola.
Ky është një tjetër dëmtim për sulmuesin francez, i cili më herët kishte pësuar probleme fizike edhe në ndeshjen ndaj Bayern Munich. Gjendja e tij aktuale ngre pikëpyetje edhe për përgatitjen në prag të Botërorit 2026, ku pritet të jetë një nga figurat kyçe për Francën.
