Një epokë e artë po merr fund te Manchester City. Pas 10 sezonesh në krye të skuadrës angleze, Pep Guardiola do të drejtojë për herë të fundit “Citizens” këtë të dielë, duke mbyllur një nga kapitujt më të suksesshëm në historinë e klubit.
Edhe pse tekniku katalanas kishte ende një vit kontratë me Manchester Cityn, vendimi për t’u larguar duket se është marrë prej tij, duke respektuar të drejtën që fitoi ndër vite për të vendosur vetë momentin e fundit të aventurës së tij në Angli.
Guardiola largohet pas një sezoni jo të zakonshëm për standardet e Cityt. Skuadra pati vështirësi në UEFA Champions League dhe luhatje në Premier League, por arriti të shpëtojë sezonin me sukseset në kupa, duke fituar dy trofe të rëndësishëm.
Largimi i trajnerit 55-vjeçar pritet të sjellë ndryshime të mëdha në klub, ndërsa boshllëku i tij do të ndihet jo vetëm në stol, por edhe te futbollistët që u rritën dhe shkëlqyen nën drejtimin e tij. Një prej tyre është edhe Erling Haaland, i cili i ka dhënë trajnerit një përshëndetje të veçantë pas lajmit për largimin.
Gjatë dekadës së tij te Manchester City, Guardiola transformoi klubin në një superfuqi europiane, duke fituar trofe të shumtë dhe duke ndërtuar një identitet loje që ndryshoi historinë moderne të futbollit anglez.
Tashmë mbetet për t’u parë se kush do të marrë drejtimin e Cityt dhe si do të nisë epoka pas Guardiolës.
