Donald Trump ka kërkuar shkarkimin e menjëhershëm të moderatorit Jimmy Kimmel nga ABC dhe Disney, pas një komenti të këtij të fundit për Melania Trump që ka ngjallur reagime të forta në SHBA.
Vetëm pak orë pasi Melania Trump reagoi në rrjetin “X”, duke kërkuar që ABC të mbajë qëndrim ndaj deklaratave të Kimmel, ish-presidenti u shpreh edhe më ashpër në platformën e tij “Truth Social”.
Trump e quajti Kimmel “jo aspak qesharak” dhe akuzoi emisionin e tij për shikueshmëri të ulët, duke theksuar se moderatori kishte bërë një deklaratë “tronditëse” gjatë një skeçi satirik në “Jimmy Kimmel Live!”.
Sipas tij, Kimmel kishte aluduar në mënyrë të pavërtetë për një video ku dukej sikur Melania dhe Barron Trump ndodheshin në studio, ndërsa e lidhi situatën me një incident sigurie që ndodhi më pas në Washington.
“Shumë njerëz janë të indinjuar nga kjo thirrje e turpshme për dhunë. Jimmy Kimmel duhet të shkarkohet menjëherë”, deklaroi Trump.
Reagimet vijnë pas skeçit të transmetuar në emision, ku Kimmel u tall me darkën e korrespondentëve të Shtëpisë së Bardhë, duke shkaktuar debat të gjerë në rrjet.
Melania Trump gjithashtu e ka cilësuar gjuhën e përdorur si të papranueshme dhe përçarëse, duke kërkuar masa nga rrjeti ABC.
