Kushdo që ka ardhur nga Italia apo vendet e tjera të prekura me Koronavirus dhe nuk vetëizolohet në shtëpi, do të ndëshkohet me 5 mijë euro gjobë.
Ky është vendimi i ri të cilin e bëri publik kryeministri Edi Rama, në një konferencë për shtypin pak minuta më parë.
Kreu i qeverisë bëri me dije se po përgatitet task-forca me efektivë të policisë dhe të ushtrisë për të kontrolluar në rrugë automjetet dhe njerëzit që dalin nga shtëpia pa kaluar 14 ditë në izolim shtëpiak.
“Postblloqe për kontrolle të automjeteve do të verifikojnë nëse ka të ardhur nga Italia apo Greqia në 14 ditët e fundit të cilët ndalohen të dalin nga shtëpia. Nga nesër kush prej tyre do të kapet në rrugë, do të dënohet me 5 mijë euro gjobë. Do të ndalohet të largohet nesër në Itali pas ikjes së epidemisë nëse nuk do të ketë paguar gjobën. Ju kërkoj shumë ndjesë, është një masë që në kushte normale do të ishte absurditet, nuk do doja kurrë t’ua kërkoja këtë. Por kjo nuk është një kohë normale, futeni në kokë, është një kohë lufte me një armik që nuk duket por është rreth secilit prej nesh. Do ta kalojmë siç klauam tragjedinë e 26 nëntorit ku dolëm më të fortë”.
Ndërkohë, sot është shënuar viktima e parë nga Koronavirusi në Shqipëri.
E moshuara 73-vjeçare që ishte shtruar në Durrës, ka humbur jetën në përpjekje për t’u dërguar në Tiranë për mjekim më të specializuar (lexo këtu).
