masa nga ABC pas monologut kontrovers
Melania Trump ka reaguar ashpër ndaj moderatorit të njohur Jimmy Kimmel, duke i bërë thirrje rrjetit televiziv ABC të ndërmarrë masa ndaj tij, madje duke kërkuar edhe largimin nga puna. Reagimi i saj vjen pas një monologu të transmetuar në emisionin e Kimmelit, i cili sipas saj ka kaluar kufijtë e humorit.
Përmes një postimi në platformën X, ish-Zonja e Parë e SHBA-së e cilësoi retorikën e moderatorit si të rrezikshme dhe përçarëse për shoqërinë amerikane.
“Retorika e mbushur me urrejtje dhe dhunë e Kimmelit synon të përçajë vendin tonë. Monologu i tij për familjen time nuk është humor — fjalët e tij janë të dëmshme dhe thellojnë sëmundjen politike në Amerikë”, u shpreh ajo.
Melania shtoi se figura të tilla nuk duhet të kenë hapësirë çdo mbrëmje në televizion për të transmetuar mesazhe që, sipas saj, nxisin përçarje dhe tensione. Në reagimin e saj, ajo e quajti Kimmelin edhe “frikacak”, duke pretenduar se ai fshihet pas mbështetjes së ABC-së, i cili vazhdon ta mbrojë pavarësisht polemikave.
Debati u ndez pas një komenti të bërë nga Kimmel në prag të Darkës së Korrespondentëve të Shtëpisë së Bardhë, i cili u konsiderua ofendues nga një pjesë e publikut dhe më pas u shpërnda gjerësisht në rrjete sociale.
Ky nuk është rasti i parë që moderatori përballet me kritika për deklaratat e tij, pasi më herët ai është përballur edhe me pezullime të përkohshme për komente të diskutueshme, përpara se të rikthehej sërish në ekran.
