Familja spanjolle Galdon u sulmua nga Mihal Kokëdhima gjatë gushtit të kaluar.
Biznesmeni spanjoll shkoi për të drekuar në restorantin e Kokëdhimës, por përfundoi në një skandal, pas keqkuptimit për porosinë.
Spanjolli deklaroi asokohe, se ajo që i ndodhi ishte një rast i izoluar dhe vijoi pushimet në vendin tonë.
Eugenio Galdon, një nga njerëzit më të pasur në Spanjë, themelues i kompanisë “ONO” që iu shit Vodafone për 7.2 miliardë euro, do të kthehet sërish në Shqipëri.
Biznesmeni do të ndërtojë në vendin tonë një shkollë, përmes kryqit të kuq spanjoll, duke dhënë një dorë për të kaluar pasojat e tërmetit.
Lajmin e ka bërë publik Ministria e Turizmit dhe Mjedisit, duke sqaruar se ministri Klosi dhe biznesmeni, janë takuar në Panairin Ndërkombëtar të Turizmit në Madrid.
Mësohet se djemtë e familjes Galdon, do të jenë vetë prezentë në Shqipëri.
Në gushtin e kaluar, familja Galdon kishte ardhur për pushime në Shqipëri.
Pas pakënaqësive në lidhje me shërbimin në lokalin e Mihal Kokëdhimës, ata u çuan për të ikur.
Kjo nuk i pëlqeu aspak Kokëdhimës, i cili u var në kofanon e makinës që shoqëronte familjen spanjolle, duke tentuar madje të shqyejë me forcë xhamin e përparmë.
Për këtë veprim, Mihal Kokëdhima u dënua nga gjykata me 1 vit heqje lirie.
