Çdo fundjavë të gjithë kemi dilemën se çfarë duhet të bëjmë: të rrimë në shtëpi para televizorit, apo të dalim dhe të shëtisim vende të reja të cilat nuk kemi pasur mundësi t’i eksploronim më parë?
Është e sigurt se nëse qëndroni të mbyllur në shtëpi para televizorit më shumë do të stresoheni se sa do të relaksoheni. Nëse doni që ta nisni me sa më shumë energji javën e re që iu pret ju sugjerojmë që udhëtimet në natyrë janë zgjidhja ideale për një fundjavë sa më relaksuese.
“Iconstyle.al” këtë fundjavë ju sugjeron të zbuloni një vend piktoresk shumë afër Tiranës dhe Elbasanit, por që jo të gjithë e njohin. Bëhet fjalë Syrin e Cikllopit, një destinacion për të kaluar një fundjavë ndryshe nga të tjerat.
Foto nga Explore Albania
E dini ku ndodhet?
Syri i Cikllopit, ose siç i thonë ndryshe Gjurma e Ciklopit, ndodhet rreth 4 km poshtë Kërrabës, në fshatin e quajtur Skëterrë, në luginën e lumit Erzen. Ai është rreth 20 m i gjerë dhe 120 m i thellë si një perlë e fshehur në grykën e Kërrabës.
Deri në fshatin Skëterrë mund të shkoni me makinë, pastaj pjesën tjetër duhet ta bëni më këmbë për shkak të terrenit të vështirë, por edhe për t’iu dhënë mundësinë që të shijoni sa më shumë bukuritë natyrore.
Për të mbërritur tek ajo që banorët e quajnë Syri i Cikllopit duhet të kalosh nëpër një shteg të ngushtë, në një vend të pashkelur për rreth një orë, ndërsa pamja që shfaqet menjëherë është mahnitëse.
Çfarë na ofron Syri i Cikllopit?
Me një natyrë piktoreske dhe legjendën e lashtë që mban mbi supe Syri i Ciklopit të ofron së pari mundësinë e turizmit historik.
Ai është si një humnerë e vogël që rri në fund të shkëmbinjve të Kërrabës dhe poshtë saj është një liqen i smeraldtë, për të cilin thonë se është vendi ku bisha dha shpirt e pas tij mbeti një liqen në formë zemre.
Shkurtimisht kjo legjendë flet për një bishë të stërmadhe, e cila e përndjekur nga banorët e zonës, pas shumë dëmeve që kishte shkaktuar, përfundoi pikërisht poshtë këtyre shkëmbinjve. Thonë se aty ku shkeli për herë të fundit bisha, mbetën gjurmët e gërvishtjes së kthetrave të tij dhe aty ku vdiq, mbeti një liqen në formë zemre. Si të gjitha legjendat që trupin dhe kokën i kanë në imagjinatë, por këmbët i kanë të ngulura fort tek e vërteta, edhe në këtë rast, shihen disa gërvishtje të thella në shkëmb dhe liqenin e mrekullueshëm në formë zemre.
Por nuk është vetëm legjenda e krijimit të tij, por edhe natyra piktoreske dhe peizazhi i virgjër ai që fton çdo ditë turistë të huaj dhe shqiptarë.
Një degë e Lumit Erzen, rrjedh në formën e një katarakti të vogël, e bashkë me formacionet e shumta të shkëmbinjve krijojnë një peizazh përrallor. Mund të thuhet pa frikë se kjo pikë natyrore është një nga zbulimet e fundit të bëra nga aventurierët e natyrës.
Foto nga Discover Albania
Çfarë mund të bëjë gjatë kësaj fundjave tek Syri i Cikllopit?
Ai është një destinacion që të relakson dhe të argëton në të njëjtën kohë. Përveçse do të keni mundësinë të shikoni konkretisht të gjitha detajet që thotë legjenda mbi krijimin e tij, ju do të keni mundësi të zhvilloni sportin e ecjes. Grupe të shumta të organizuara shqiptare dhe të huaja zhvillojnë sportin e “hiking” në këtë zonë.
Foto nga Discover Albania
Gjithashtu në ditët e nxehta mund ta shfrytëzoni liqenin në formë zemre për të bërë plazh dhe nuk keni nevojë të shkoni në pishina.
Foto nga Explore Albania
Mund të realizoni edhe një piknik me familjen apo shoqërinë tuaj në natyrën relaksuese që ofron kjo zonë.
Çfarë duhet të marrim me vete?
Duke ditur që një pjesë e konsiderueshme rruge do të bëhet në këmbë sugjerohet që të visheni sa më sportiv. Duhet të merrni me vete ujë dhe fruta në mënyrë që të keni sa më shumë energji.
Rrobat e plazhit nuk duhet të mungojë asnjëherë, pasi pavarësisht kohës gjithmonë ekziston dëshira për një zhytje në liqen.
Foto nga Discover Albania
