Ka disa këngëtarë që pavarësisht zërit dhe vlerave të tyre në muzikën shqiptare, nuk kanë realizuar asnjë videoklip. Kejsi Tola është një prej tyre!
I vetmi videoklip që ka, është ai i këngës “Carry me in your dreams”, si pjesë e përfaqësimit të Shqipërisë në Eurovision-in e 2009-s.
E pyetur nga “Thumb”, pse s’ka realizuar asnjë videoklip të këngëve të saj më të njohura, si: “Ajsberg” apo “Mbretëreshë e fantazisë”, ajo pranoi se mungesa e financave e ka penguar.
“Lekë s’kam patur ndonjëherë: pse, ka ndonjë gjë të keqe? Por s’ka qenë vetëm kjo arsyeja; s’erdhën rrethanat e duhura në kohën e duhur”, u shpreh Tola.
E pyetur si ndihet që këngëtare si Era Istrefi apo Enca kanë nënshkruar kontrata me kompani të huaja diskografike, Kejsi kujtoi se pas “Eurosong”-ut, pati mundësinë të hynte në bisedime me një producent të huaj, por ishte ende e papjekur dhe e humbi.
“Unë mendoj që secili prej nesh e meriton pafund atë që merr në jetë. Për momentin, kaq kam kërkuar dhe kaq kam merituar. Madje, jam shumë e lumtur për këngëtarët shqiptarë që ia dalin jashtë vendit”, tha ajo.
