Ndërkohë që i gjithë vendi është përfshirë nga paniku për emergjencën COVID-19, institucionet publike shqiptare vijojnë të pashqetësuara me programin e tyre të punës.
I tillë është rasi i Fondit Shqiptar të Zhvillimit, që ditën e djeshme ka hapur garën për 8 tenderë për rindërtimin e shkollave të dëmtuara nga tërmeti i 26 nëntorit.
Në total, vlera e ketyre tenderëve arrin 4,175,217,853.00 lekë, ndërkohë që në vend, gjithçka është paralizuar.
Por teksa Fondi Shqiptar i Zhvillimit po mendon të nisë punën për rindërtimin e shkollave të dëmtuara, për shkak të koronavirusit mësimi prej më shumë se një jave po zhvillohet nëpërmjet televizionit e aplikacioneve dhe ende nuk dihet se kur situata do të rikthehet në normalitet.
Në situatën në të cilën gjendet vendi ynë aktualisht, emergjenca e vërtetë ku nevojiten dhe fondet më të mëdha është ajo e shëndetësisë, që dëshmohet nga tenderi i organizuar në mënyrë të rrufeshme nga Ministria e Shëndetësisë ditën e sotme për blerjen e respiratorëve, sërish në një shifër tejet të ulët e të pamjaftueshme (lexo këtu).
Pra në një kohë të tillë pasigurie kur as nuk dihet se kur do të rihapen shkollat dhe sistemi shëndetësor rrezikon një kolaps pasi pritet që në javët në vazhdim shifrat e të prekurve të rriten drastikisht, institucionet tona publike vendosin të vijojnë punën sikur s’ka ndodhur asgjë.
Qeveria shqiptare në tërësi duket e përfshirë nga një mungesë organizimi e jashtëzakonshme, ndërkohë që fonde të tilla të majme mund të përdoreshin jo vetëm për shëndetësinë, por edhe për t’u ofruar internet falas nxënësve e studentëve si dhe për të sofistikuar më tej metodën e të mësuarit virtualisht dhe nëpërmjet televizionit.
