Në 21 janar të këtij viti futbollisti i njohur humbi jetën gjatë udhëtimit nga Franca në Angli. Në bordin e avionit të zhdukur ishte futbollisti i njohur, Emiliano Sala, i cili u transferua nga Nanta te Cardiff City.
Trupi i tij u gjet rreth dy javë më pas në fillim të muajit shkurt, ndërsa vdekja e tij ka krijuar polemika mes dy klubeve të futbollit.
Nantes pretendon që të paguhet sipas kontratës së transferimit të futbollistit për 17 milionë euro, ndërsa Cardiff nuk ka ndërmend të japë asnjë para.
Klubi francez mësohet se i është drejtuar FIFA-s, ndërsa qeveria botërore e futbollit ka kërkuar të gjithë dokumentacionin e transferimit.
Cardiff pretendon se nuk ka depozituar asnjë dokument që zyrtarizon blerjen e lojtarit dhe se ai nuk ishte regjistruar në “Premier League”.
“Nuk do të paguajmë asnjë qindarkë”, shprehen drejtuesit e klubit.
Nga hetimet paraprake mësohet se, piloti britanik David Ibbotson nuk i lejohej të udhëtonte në mot të keq, por ai e ngriti avionin pavarësisht stuhisë. Në raport thuhet se futbollisti humbi jetën si pasojë e “plagëve në kokë dhe në gjoks”. Trupi i tij u gjet më 4 shkurt në një pjesë të avionit të shkatërruar dhe u identifikua vetëm falë gjurmëve të gishtërinjve.
