Kosova ka arritur një fitore spektakolare dhe shumë të rëndësishme në Bratislavë, duke mposhtur Sllovakinë me rezultatin 3-4 në gjysmëfinalen e play-off-it për Kupën e Botës 2026. Një ndeshje e mbushur me emocione, gola dhe kthesa, që konfirmoi karakterin dhe ambicien e “Dardanëve”.
Takimi nisi më mirë për vendasit, të cilët kaluan në avantazh që në minutën e 6-të me Valjent, duke shfrytëzuar momentin e parë të rrezikshëm. Megjithatë, reagimi i Kosovës nuk vonoi. Në minutën e 21’, Hoxha realizoi një gol të bukur, duke rikthyer baraspeshën dhe duke i dhënë zemër skuadrës.
Kur dukej se pjesa e parë do të mbyllej në barazim, një moment pakujdesie në mbrojtjen e Kosovës u ndëshkua nga sllovakët, të cilët gjetën golin e dytë dhe shkuan në pushim në avantazh.
Në pjesën e dytë, Kosova ndryshoi plotësisht ritmin e lojës dhe dominoi në fushë. Vetëm dy minuta pas rifillimit, në të 47’, Fisnik Asllani shënoi golin e barazimit, duke rikthyer shpresat për një përmbysje.
Presioni vazhdoi dhe në minutën e 60’, Muslija realizoi një supergol nga distanca, duke kaluar Kosovën për herë të parë në avantazh. Dardanët nuk u ndalën me kaq. Në minutën e 72’, Hajrizi përfitoi nga një situatë në zonë dhe shënoi golin e katërt, duke e çuar rezultatin në 2-4 dhe duke afruar shumë pranë fitores.
Në minutat shtesë, Strelec shënoi për Sllovakinë, duke ngushtuar diferencën në 3-4, por goli shërbeu vetëm për statistikë, pasi Kosova arriti ta menaxhojë avantazhin deri në fund.
Me këtë fitore të madhe, Kosova siguron kalimin në finalen e play-off-it dhe vazhdon të mbajë gjallë ëndrrën për një kualifikim historik në Botërorin 2026. Tashmë, “Dardanët” do të përballen me Turqinë në finalen vendimtare që do të zhvillohet në Prishtinë, ku do të vendoset gjithçka për biletën drejt Kupës së Botës.
Një hap larg historisë dhe Kosova është gati ta shkruajë atë.
