Gjithnjë e më shumë sfilatat e modës po u kthehen trendeve të së kaluarës. Ndoshta mendojmë se i japim më shumë rëndësi tani stilit të veshjes, por gjithmonë ka pasur një ndikim të madh.
Ndër shekuj, njerëzit e kanë kuptuar fuqinë e veshjes dhe e kanë përdorur këtë. Veshja është mënyra më e mirë për të komunikuar me publikun, vartësit e tu apo personat që do t’u përcjellësh një mesazh.
Pikërisht ky ishte një nga detajet që përcolli sfilata unike e “Institutit të Maturimit” në Ankara dhe atij “Yunus Emre” në Shkodër, në bashkëpunim me modelët e “ICON Agency”. Për herë të parë veshjet e shekullit XII-XIII të dijetarëve mistikë turq u shfaqën në skenën e “Teatrit Migjeni” në Shkodër, më 27 mars (të hënën).
Çdo veshje, që u soll në mënyrë identike me origjinalen, ishte realizuar falë punës me dorë dhe përmbante elemente unike. Në këtë kostumografi përfshiheshin veshje tradicionale femërore dhe mashkullore, ku spikaste modestia, ekuilibri i simetrisë, harmonisë, ngjyrës dhe kontrastit, të gjitha këto të kompozuara duke u mbështetur në elementët zbukurues të periudhës Selçukëve, si ylli me tetë cepa, ornamentet të arkitekturës së epokës dhe elementët mistikë të dijetarëve të asokohe.
Modelët ndërthurën aq bukur sfilatën me aktrimin, për të sjellë në mënyrën e duhur mesazhin që përcolli secili prej personazheve. “ICON Agency” u gjend dje që në mëngjes në Shkodër, ku modelët u përkushtuan me përgatitjet deri në nisjes e shfaqjes në orën 19:00, në “Teatrin Migjeni”.
16 modelët pasqyruan me profesionalizëm, jo vetëm veshjen e asaj epoke, por edhe shpirtin e mistikëve të mëdhenj turq që jetuan gjatë kësaj periudhe në Anadoll, republikat turke dhe trevat e Ballkanit, duke i përcjellë mbarë botës ndjenjën e dashurisë, vëllazërisë dhe paqes.
“ICON Agency” falënderon fotografët Sonny K. Elson dhe Elus Skëndaj, si dhe modelët: Melisa Shehaj, River Durra, Erald Farruku, Greta Kapo, Alessandra Beqiraj, Arentina Shakulli, Klaudia Kalia, Amarilda, Petrula Vasku, Xhovana Doçi, Migers Bineri, Bruno Shemsho, Denis Biduli, Xhoen Tugu, Anest Hysa, Anxhelo Malia, për eksperiencën e veçantë që na ofruan.
*Shfleto galerinë
Burimi: Iconstyle
