Banorët dhe të afërmit e personave që humbën banesat nga zjarri që ‘përpiu’ pallatin shumëkatësh, kanë treguar detaje nga ngjarja.
Një qytetare në një prononcim për mediat shprehet se që prej pasdites së djeshme ka humbur kontaktet me shoqen e saj. Ajo tha se e telefonon, por celulari rezulton i fikur.
“E telefonoj, por e ka të fikur. Nuk kam folur që dje pasdite, ndaj erdha të pyes. Mendoj se do jetë larguar nga shtëpia, pasi jetonte vetëm. Është rreth 70 vjeçe.”, u shpreh ajo.
Zjarri masiv që shkrumboi dje një prej godinave të kompleksit ‘Arlis’ në zonën e njohur si ‘Farmacia 10’ në kryeqytet, ka lënë pas hi, dhimbje e lot në sytë e banorëve. Rreth 30 banesa janë prekur nga flakët, dëmet përllogariten të mëdha ndërsa në orët në vijim pritet të bëhet bilanci i plotë.
Në kërkim nga policia është shpallur ndërtuesi i kompleksit ‘Arlis’, Armando Lilo, ndërsa është arrestuar menaxherja e marketit nga ku dyshohet se ka nisur zjarri, administratori i pallatit dhe 2 persona të tjerë.
Shkaku i nisjes së zjarrit është ende i paqartë, ndërsa vatra ka qenë në katin 0 ngjitur me një market, në hapësirën e jashtme. Nuk dihet ende nëse ka pasur ndonjë kuti të shpërndarjes së energjisë elektrike në afërsi. Dyshohet se faktori kryesor që ka nxitur përhapjen e flakëve deri në katin e 12-të brenda një kohë të shkurtër, të ketë qenë materiali i fasadës së pallatit.
