Një sulm ajror rus me dron ka goditur qytetin ukrainas të Prilukit gjatë natës, duke shkaktuar një tragjedi të rëndë familjare. Presidenti ukrainas Volodymyr Zelensky bëri të ditur se në mesin e pesë viktimave ishin gruaja, vajza dhe nipi 1-vjeçar i shefit lokal të zjarrfikësve, i cili vetë po punonte në operacionin e shpëtimit për të nxjerrë trupat nga rrënojat.
Zelensky e quajti këtë ngjarje një simbol të tmerrshëm të pasojave që sjell lufta dhe njoftoi se fëmija 1-vjeçar ishte viktima e 632-të fëmijë që ka humbur jetën që nga fillimi i agresionit rus në Ukrainë.
“Rusia po përpiqet vazhdimisht të fitojë kohë për të vazhduar vrasjet. Kur nuk ndjen dënim dhe presion të mjaftueshëm nga bota, ajo vret përsëri,” shkroi Zelensky në një postim në platformën X.
Sipas presidentit, gjatë natës, Ukraina është sulmuar nga 103 dronë dhe një raketë balistike, të cilat kanë goditur rajonet e Donetskut, Kharkivit, Odesës, Sumit, Çernihivit, Dnipros dhe Khersonit.
