Pothuajse një në pesë persona që kanë kaluar Covid-19, diagnostikohet me një çrregullim psikiatrik të tillë si ankthi, depresioni apo pagjumësia, në harkun kohor të 90 ditëve nga testimi pozitiv për virusin.
Ky është rezultati i fundit i një studimi të kryer nga Universiteti i Oxfordit dhe Qendra e Kërkimit Biomjekësor Shëndetësor në Oksford NIHR.
Sipas këtij studimi, njerëzit me një diagnozë para-ekzistuese të shëndetit mendor kishin 65% më shumë gjasa të diagnostikohen me COVID-19, sesa ata pa një diagnozë të tillë, madje duke llogaritur edhe faktorët e njohur të rrezikut si mosha apo kushtet themelore fizike.
Njëri prej autorëve dhe bashkëpunëtorëve të Qendrës së Kërkimit Biomjekësor, Dr. Max Taquet, ka treguar se sipas studimit, edhe çrregullimi psikiatrik do të shtohet në listën e faktorëve të rrezikut nga Covid-19. Duke qenë se ky virus ka ende shumë të panjohura, lista e rreziqeve nga covid është ende e hapur dhe e gatshme për të shtuar edhe opsione të tjera.
“Ky zbulim ishte i papritur dhe ka nevojë për hetim. Ndërkohë, të kesh një çrregullim psikiatrik duhet të shtohet në listën e faktorëve të rrezikut për COVID-19″, ka deklaruar Dr Max Taquet.
Llogaritjet u bënë në bazë të afërsisht 70 milion regjistrave shëndetësorë amerikanë, duke përfshirë më shumë se 62,000 raste të COVID-19 që nuk kërkonin një qëndrim në spital ose një vizitë në departamentin e urgjencës.
Prekja e sistemit nervor nga çdo diagnozë të sëmundjeve mendore në 14 deri 90 ditë pas COVID-19 është 18.1%, shkruan The Guardian.
Studiuesit e Oxford, krahasuan të dhënat me gjashtë gjendje të tjera mjekësore gjatë së njëjtës periudhë: grip, infeksione të tjera të traktit respirator, një infeksion i lëkurës; gurët në tëmth dhe gurë në traktin urinar, në mënyrë që të shqyrtohet fakti nëse rreziku i tepërt ishte i lidhur drejtpërdrejt me COVID-19.
Hulumtimet sugjerojnë që njerëzit me prejardhje të varfër socio-ekonomike kanë më shumë të ngjarë të vuajnë nga shëndeti i keq mendor. Varfëria gjithashtu rrit ekspozimin ndaj coronavirusit, për shkak të faktorëve si strehimi i mbushur me shumë njerëz dhe kushtet e pasigurta të punës.
Një zbulim veçanërisht shqetësues ishte dyfishimi i diagnozës së dementias, e cila zakonisht është e pakthyeshme, tre muaj pas testimit pozitiv me COVID-19, përkundrejt kushteve të tjera shëndetësore.
Studimet që hulumtojnë ndikimin e virusit në tru dhe sistemin nervor qendror janë duke u zhvilluar, përfshirë këtu një partneritet në Mbretërinë e Bashkuar me fokus eksplorimin e ndërlikimeve neurologjike dhe neuropsikiatrike të COVID-19.
Studiuesit kanë theksuar se ka ende të panjohura rreth virusit dhe vetëm koha do të tregojë nëse incidenca e sëmundjes psikiatrike pas-COVID-19 vazhdon të rritet apo të vazhdojë përtej periudhës tre-mujore./Iconstyle.al/
