Mbrëmjen e sotme ka shkuar në 32 numri i jetëve të humbura për shkak të Covid-19 në vendin tonë.
Një paciente nga Tirana ka ndërruar jetë në Spitalin e Infektivit.
Viktima ishte 64 vjeç dhe ishte shtruar prej tre javësh në spital.
Ajo ishte në gjendje të rëndë shëndetësore dhe prej 4 muajsh vuante nga limfoma e trurit.
Pavarësisht përpjekjeve të stafit ajo nuk ka mundur të shpëtojë, ndërsa lajmi është konfirmuar nga Ministria e Shëndetësisë.
Njoftimi i Ministrisë:
“Ndërron jetë në spitalin infektiv 64-vjeçarja, vuante nga limfoma e trurit. Mbrëmjen e sotme ka ndërruar jetë në spitalin Infektiv një paciente 64-vjeçare nga Tirana, e konfirmuar me COVID-19, e cila ishte e shtruar prej 3 javësh në spital, në gjendje të rëndë.
64-vjeçarja që vuante prej 4 muajsh nga limfoma e trurit, nuk arriti dot të mbijetonte, pavarësisht mjekimit intensiv dhe përpjekjeve të stafit mjekësor. 64-vjeçarja është viktima e 32 e prekur nga COVID-19 në Shqipëri.
Ministria e Shëndetësisë i shpreh ngushëllimet familjes së të ndjerës dhe apelon edhe një herë qytetarët të respektojnë rregullat e distancimit social, për të mbrojtur veten dhe të tjerët”.
Deri tani, Shqipëria numëron gjithsej 989 raste të konfirmuara me Covid-19.
