Duke qenë një sëmundje e re, ka shumë pak informacion në lidhje me medikamentet që mund të përdoren kundër virusit COVID-19 që ka mbërthyer botën mbarë.
Por ndër informacionet që ka qarkulluar ditët e fundit është se përdorimi i Ibuprofenit dhe Kortizonit për qetësimin e simptomave, nuk është i këshillueshëm pasi mund t’i rëndojë ato.
Një gjë e tillë është thënë publikisht nga Ministri i Shëndetësisë në Francë, çka kundërshton dhe këshillat e dhëna nga shefi i Urgjencës së Tiranë, Skënder Brataj i cili pak ditë më parë u sugjeroi personave që kanë simptoma të koronavirusit të pinin Brufen (me përbërës kryesor Ibuprofenin) në rast se temperatura nuk ulej.
Sakaq, të painformuar mbi efektet e Ibuprofenit, prindërit e 4-vjeçares britanike Amelia Milner i kanë dhënë asaj pikërisht këtë medikament për ta qetësuar, pasi vogëlushja kishte shfaqur simptoma të koronavirusit: kollë dhe temperaturë.
Por në vend që të qetësohej, simptomat e saj u rënduan edhe më keq. Prindërit e 4-vjeçares treguan për “Manchester Evening News” se vajza nisi të dridhej, iu rrit temperatura, iu përshpejtua frymëmarrja, kishte rrahje tejet të shpejta zemra dhe nisi të villte.
“Brenda një ore pasi ia dhamë, vajza u përkeqësua në mënyrë të frikshme. Ajo nisi të gulçonte ndërkohë që përpiqej të merrte frymë, rrahjte e zemrës ishin shumë të shpejta, nuk i mbante dot sytë hapur, nuk e ngrinte dot kokën, nisi të dridhej e të villte ndërkohë që temperatura i vajti 39.4 gradë Celcius.”-rrëfen babai i 4-vjeçares.
Ai tregon se në moment lajmëruan Urgjencën dhe mjekët me të mbërritur, morën masa për të stabilizuar gjendjen e saj. Tashmë ajo e ka kaluar fazën e rrezikut, por familja është vetëizoluar në shtëpi si pasojë e dyshimeve për infektimin nga koronavirus ndërsa janë këshilluar të mos marrin Ibuprofen.
