Turizmi në vendin tonë është duke u përballur me një goditje të dytë të fortë brenda një periudhe shumë të shkurtër.
Pas tërmetit shkatërrues, u desh pandemia Covid-19 për të “gjunjëzuar” sektorin e turizmit të Shqipërisë.
Më herët, Anëtari i shoqatës së turoperatorëve, Besnik Vathi, tregoi se rezervimet për pranverën ishin anuluar 100%, ndërsa për muajt e verës 70% e tyre.
30% janë ende në pritje për të parë se ç’do të ndodhë. (Lexo këtu)
Turizmi shqiptar ka pasur dëme të jashtëzakonshme, ndaj për rimëkëmbjen e tij, Shoqata e Agjencive Turistike i ka dërguar qeverisë një letër me 5 kërkesa themelore.
Në letër Shoqata shprehet se kjo është mënyra e vetme për ta kthyer turizmin në punë, pas dy goditjeve të rënda si tërmeti i 26 nëntorit dhe emergjenca Covid-19.
5 kërkesat themelore:
- Kërkohet më shumë mbështetje financiare për operatorët turistikë, ku propohet rimbursimi për ardhjen e turistëve të huaj, rimbursimi i TVSH-së për bizneset e sektorit dhe zgjerimi i paketës së ndihmës për punonjësit në disa degë të tjera.
- Kërkohet më shumë përpjekje nga qeveria për turizmin dalës, si lidhja e marrëveshjeve me shtetet e BE-së për të hequr masat e karantimit të detyrueshëm.
- Në pikën e tretë, ku përfshihet turizmi hyrës kërkohet hapja sa më e shpejtë e kufijve dhe lejimi i krocierave në brigjet shqiptare.
- Shoqatat kërkojnë fokus të veçantë tek vizitat në muze dhe sitet kulturore, për të ulur çmimin e tarifave dhe bonuse për turoperatorët.
- Shoqata thekson nevojën e plotësimit të kuadrit ligjor, duke i bërë thirrje qeverisë për të vazhduar me përfundimin e Ligjit të Turizmit, që bën të mundur edhe përfshirjen e mekanizmave financiare mbrojtëse për situata të tilla emergjente.
