Numri i personave të infektuar nga virusi vdekjeprurës Covid-19 në Shqipëri ka shkuar në 76 ditën e sotme, ndërsa janë shënuar edhe dy viktima.
Një prej 76 të infektuarve është një vajzë e re, e cila e ka konfirmuar publikisht prekjen nga koronavirusi në një video ku jep edhe një mesazh tepër të rëndësishëm.
E reja tregon se është e prekura nr. 69, ndërsa rrëfehet se situata që po kalon nuk është aspak e lehtë.
Vajza tregon se po qëndron e izoluar totalisht pasi testi i saj ka rezultuar pozitiv, ndërkohë që shpjegon që i ka respektuar rregullat e qeverisë dhe nuk ka pasur kontakt me persona të infektuar.
Ajo i bën thirrje të gjithëve të qëndrojnë në shtëpi, pasi është veprimi më i mirë për të ndihmuar veten dhe personat që po luftojnë me këtë epidemi.
“Pasojat psikologjike të të qëndruarit brenda në shtëpi, sidomos kur je i shëndetshëm, më besoni janë komplet të papërfillshme krahasuar me pasojat që të lë të shikosh familjarin që ta merr ambulanca, një familjar me të cilin do kesh kontakt vetëm telefonik për kushedi se sa kohë. Përveç kësaj, me pasojën që do kesh kur të vijnë të të bëjnë analizën dhe të të trajtojnë sikur je literalisht një mbetje kimike, sepse fundja në këtë pikë ke thuajse të njëjtën rrezikshmëri për të tjerët.”- thotë vajza me lot në sy.
“Ky virus nuk është shaka, po jua thotë dikush që po vuan pasojat. Po jua thotë dikush që ka dikë të shtruar në spital dhe po jua thotë dikush që është karantinuar momentalisht në shtëpi, me zero kontakt njerëzor.”- shton ajo më tej.
Video-mesazhin e vajzës e ka ndarë në llogarinë e tij në Facebook kryeministri Rama, i cili i ka dhënë mbështetjen e tij në këto ditë të vështira.
“Ti nuk do jesh kurrë vetëm”- shkruan Rama me hashtag për të renë e infektuar.
https://www.facebook.com/edirama.al/videos/521876838523676/?notif_id=1584785293431665¬if_t=live_video
