Dy ilaçet që mund të ndryshojnë gjithçka: Trump thirrje institucioneve t’i aprovojnë menjëherë

Një ilaç i përdorur kundër malaries dhe një medikament i përdorur për të trajtuar disa lloje infeksionesh mund të jenë shpëtimi për të prekurit nga koronavirus dhe këtë e ka konfirmuar së fundmi presidenti amerikan Donald Trump.

Duke iu referuar një studimi francez në të cilin ka rezultuar se kombinimi i hydrochloroquine dhe azythromicin shkurton drastikisht zgjatjen e infeksionit, Trump i ka bërë thirrje FDA-së (Food and Drug Administration) që të aprovojë sa më shpejt përdorimin e këtyre medikamenteve për të sëmurët me COVID-19.

“HYDROXYCHLOROQUINE & AZITHROMYCIN, të marra së bashku, kanë probabilitetin të shënojnë revolucion në historinë e mjekësisë. FDA-ja ka lëvizur malet! Faleminderit! Shpresoj që të dyja të vihen në përdorim sa më shpejt. Njerëzit po vdesin, lëvizni shpejt dhe Zoti i bekoftë të gjithë!”- është shprehur Trump në Twitter.

Dhe sikurse ka thënë së fundmi presidenti amerikan i cili prej vetëm një jave ka nisur marrjen serioze të masave për parandalimin e përhapjes së virusit, “iconstyle.al” prej kohësh ka cituar mediat e huaja e protokollet e trajtimeve në botë, ku një prej medikamenteve të përdorura është pikërisht chloroquine, që ka rezultuar në shumë raste efektive në luftën kundër COVID-19.

Por ndonëse spitale në vendet më të prekura e kanë bërë ilaçin kundër malaries pjesë të protokolleve të tyre të trajtimit, një gjë e tillë nuk ka ndodhur ende në Shqipëri, apo të paktën për aq sa është thënë deri më tani në informacionet në rrugë jozyrtare.

Nga Ministria e Shëndetësisë deri më sot nuk ka pasur asnjë deklaratë zyrtare lidhur me medikamentet që po përdoren për të trajtuar të prekurit me koronavirus në vend, as për llojet e tyre e as për sasitë, duke i lënë qytetarët në një terr informativ në një kohë kur paniku sa vjen e shtohet, paralelisht me shtimin e numrit të të prekurve.

Deklarata e vetme lidhur me këtë çështje ka qenë ajo e mjekut Tritan Kalo i cili nëpërmjet një postimi në rrjetet sociale, ka konfirmuar se të prekurit në spitalin Infektiv po trajtohen me Aluvia (medikament për të prekurit me HIV që ka rezultuar i suksesshëm), Actemra (medikament kundër artritit që ka rezultuar i suksesshëm) dhe Tamiflu ( antiviral që nuk ka rezultuar efektiv).

Por ndërkohë që bota diskuton hapur mbi kurat për koronavirusin, mungesa totale e transparencës nga institucionet tona të shëndetësisë të bëjnë të dyshosh se diçka në këtë mes, nuk po shkon siç duhet.