Ministrja e Arsimit tregon planin e shkollave: Kur t’i kthehemi normalitetit, e shtuna mësim

Minstrja e Arsimit, Besa Shahini, ka treguar në një lidhje me “News24” planin e shkollave në vend kur gjithçka t’i kthehet normalitetit.

Shahini tregoi se dezinfektimi i shkollave ka përfunduar, duke shtuar se mësimi do të vijojë edhe të shtunën sapo t’i kthehemi gjendjes së mëparshme.

Ky vendim vjen për të mos rrezikuar vitin akademik, pasi orët e humbura do të zëvendësohen.

Momentalisht, mësimi po zhvillohet në dy mënyra, nëpërmjet internetit dhe leksioneve nga televizori.

“Një pjesë e madhe e Bashkisë i kanë mbyllur dizinfektimet. Të gjitha bashkitë kanë kryer dizinfektimin tashmë të shkollave. Nuk e dimë se kur do kthehemi dhe nuk dimë asgjë sa zgjat situata, duhet të veprojmë sipas rrethanave. Nëse kthehemi në shkolla, të shtunat do të bëhen mësim. Mësuesit dhe nxënësit po merren vesh me njëri tjetrin në forma elektronike më tepër. E vetmja pengesë është se 4 ose 5 përqind të nxënësve nuk kanë internet ose nuk kanë pajisje teknologjike dhe këta nxënës po ndjekin leksionet ose mësimet në televizion. Vlerësimet bëhen nga mësuesit. Temat që janë dhënë gjatë gjithë kësaj kohe, do të fliten me nxënësit. Problemet i kanë ata mësues që kanë shumë nxënës, me të cilët duhet të komunikojë. Të tillë mësues e kanë të vështirë që të flas me nxënësit një më një”,- u shpreh Shahini.