Ju pëlqejnë sekretet? Epo lini telefonat mënjanë dhe kini vëmendjen e duhur sepse do të përfshiheni në një rrjet sekretesh të ndërlikuara që të lënë pa fjalë, në serialin më të ri që kemi përzgjedhur sot për ju!
“Dark” është një serial sci-fi, që tregon historinë e një qyteti të vogël gjerman Winden, ku zhdukja e mistershme e tre djemve të vegjël, vë në lëvizje çdo banor. E kaluara e katër familjeve ekspozohet së bashku me jetën e dyfishtë që bëjnë ato, teksa vihen në kërkim të djemve të vegjël.
Ngjarjet zhvillohen në një cikël kohor 33-vjeçar, ndaj duhet të mbani mend dhe të dalloni vitet 1953, 1986 dhe 2019.
Ideja e udhëtimit në kohë është një nga skenarët më të përdorur në filmat e këtij zhaneri, por “Dark” e sjell në një mënyrë të përkryer duke i dhënë përgjigje një pyetje ekzistenciale: Si ndikon e ardhmja te e shkuara?
Misteri më i madh lidhet me një shpellë që ekziston në pyllin e Winden. Në vitin 1986, një shpërthim në termocentral krijoi shpellën që do të bëhet objektivi kyç i serialit.
Gjithçka fillon me zhdukjen e Mikkel, një djaloshi 11-vjeçar i cili i ka fiksim truket e magjistarit Houdini.
Në 4 nëntor 2019, Mikkel i shoqëruar nga vëllai dhe motra e tij, Magnus dhe Martha, dhe shokët e tyre, Jonas, Bartosz dhe Franziska, shkojnë në shpellën që ndodhet në pyllin e Winden.
Pasi dëgjojnë një zhurmë të çuditshme, të gjithë largohen, përveç Mikkel-it, i cili zhduket papritur.
Të gjithë vihen në kërkim të tij, pasi kjo nuk është zhdukja e parë që ndodh në qytet. Dy javë më parë ishte zhdukur djaloshi Erik Obendorf, nga i cili nuk ka asnjë gjurmë.
E megjithatë, Mikkel dhe Erik nuk janë të vetmit djem që janë zhdukur, pasi 33 vjet më parë, në vitin 1986, vëllai i të atit të Mikkel, Mads gjithashtu ishte zhdukur.
Deri tani, 3 djem të zhdukur!
21 qershori 2019 është gjithashtu një datë domethënëse pasi 43-vjeçari Michael, babai i Jonas var veten në skenën hapëse të episodit të parë. Ai lë një letër me udhëzimin për të mos e hapur deri në datën 4 nëntor në orën 10:13, që është data kur Mikkel zhduket.
Por a është zhdukur në të vërtetë Mikkel? Një trup i pajetë i një të riu gjendet në pyll pas zhdukjes së tij. I kujt është ai?
Ngjarjet shtrihen në 3 cikle të ndryshme kohore, ndaj ato rikthehen edhe në vitin 1953, po në Winden, ku në tokën ku do të ndërtohet centrali bërthamor, gjenden dy trupa të pajetë të vegjlish!
SPOILER!
……….
…..
…
Nëse nuk po pret dot të shohësh se çfarë ndodhi me Mikkel, po ju zbulojmë vetëm një pjesë të gjithë misterit.
Mikkel udhëton në kohë përmes shpellës, por nuk shkon në të ardhmen, por në vitin 1986, ku adoptohet nga Ines dhe merr emrin Michael. Më pas ai martohet me Hannah, dhe bashkë bëhen prindërit e Jonas, të cilin po ta mbani mend është djali i 43-vjeçarit që vdiq më 21 qershor 2019.
Po, e ka dhe një histori dashurie!
Le të kthehemi te Jonas, djali i Michael, i cili do të jetë dhe personazhi kryesor i serialit. Kur babai i Jonas var veten, djaloshi largohet nga Winden për disa javë. Ai ndjek terapi pas vetëvrasjes së babait të tij, por traumat ndjekin njëra-tjetrën në jetën e Jonas. Pas kthimit, ai shokohet kur zbulon se e dashura, Martha (motra e Mikkel) është lidhur me mikun e tij më të mirë Bartosz.
Truri juaj u trash pak si shumë apo jo?
Epo ky është efekti i këtij seriali mister-dramë, i cili përfaqëson serialin e parë origjinal gjerman të prodhuar për Netflix.
Filozofia e kësaj historie e ka origjinën në filozofinë e Niçes te “Kthimi i Përjetshëm”, ndaj duhet t’i kushtoni vëmendje të madhe sepse simbolika e ngulitur si në dialog ashtu edhe në skena, është çelës për të kuptuar komplotin dhe subjektin.
Ne të premtojmë vetëm një gjë: Pasi ta kesh mbaruar këtë serial, nuk do të jesh më i njëjti!
